Ulttyq mýzeıde «Qasıetti Qazaqstan» ensıklopedııasy 4-tomynyń (Pavlodar, Soltústik Qazaqstan oblysy, Shyǵys Qazaqstan oblysy) tusaýkeser rásimi ótti.
Is-sharanyń maqsaty – Qazaqstan Respýblıkasynyń Tuńǵysh Prezıdenti – Elbasy Nursultan Nazarbaevtyń «Bolashaqqa baǵdar: rýhanı jańǵyrý» atty maqalasy negizinde qolǵa alynǵan «Qazaqstannyń kıeli jerleri» jobasy aıasynda josparlanǵan bes tomdyq ensıklopedııanyń kezekti IV tomymen tanystyrý. Sonymen qatar Pavlodar, Soltústik Qazaqstan jáne Shyǵys Qazaqstan oblystarynyń kıeli jerleri, tarıhı oqıǵalar ótken qasıetti oryndar, tabıǵı landshafttyń erekshe eskertkishteri men ulttyq kundy mádenı muralary engen tarıhı-tanymdyq mańyzǵa ıe qundy eńbekti talqylaý.
«Kitaptyń birinshi tomyna Astana men Almaty qalalarynyń jáne Aqmola men Almaty oblystarynyń, ekinshi tomyna Batys Qazaqstan, Aqtóbe, Atyraý, Mańǵystaý oblystarynyń, úshinshi tomyna Jambyl, Qaraǵandy, Qostanaı, Qyzylorda oblystarynyń, tórtinshi tomyna Pavlodar, Soltústik Qazaqstan, Shyǵys Qazaqstan oblystarynyń tarıhı oqıǵalar ótken qasıetti oryndary men keshenderi, tabıǵı landshaft eskertkishteri men el tutqasy bolǵan tarıhı tulǵalary engizildi. Kezekti Túrkistan oblysy jáne Shymkent qalasyna arnalǵan eńbektiń 5-tomy 2021 jyly jaryq kóredi dep josparlanýda», dedi óz sózinde Ulttyq mýzeıdiń «Qasıetti Qazaqstan» ǵylymı-zertteý ortalyǵynyń jetekshisi Batyrhan Jumabaev.
Atap aıtsaq, «Qasıetti Qazaqstan» bes tomdyq ensıklopedııanyń alǵashqy jınaǵy 2017 jyly jaryq kórdi. Onda Almaty jáne Aqmola oblystary, Almaty men Nur-Sultan qalalaryndaǵy kıeli nysandar kórsetilgen bolatyn. Osylaısha Qazaqstannyń barlyq óńiri qamtylyp, bul jınaq kezek-kezegimen jaryqqa shyǵarylýda. Jınaq eki tilde – qazaq jáne orys tilderinde daıyndalǵan.
Atalǵan sharaǵa elimizdiń kórnekti tarıhshy ǵalymdary, ólketanýshylar men mádenıet salasynyń ókilderi qatysyp, qazaq eliniń tarıhy men mádenı murasyna arnalǵan bul qundy eńbektiń, keleshek urpaq úshin mańyzyn atap ótti.