Memlekettik baǵdarlamalardy oryndaý barysynda Densaýlyq saqtaý mınıstrligi birqatar olqylyqtarǵa jol berdi. Atalǵan keleńsizdikti respýblıkalyq bıýdjettiń atqarylýyn baqylaý jónindegi esep komıteti anyqtaǵan. Bul týraly Kapital.kz habarlady.
Tekserý kezinde jergilikti óńirlerdegi densaýlyq saqtaý salasynyń 5 baǵyt boıynsha jumysty júıeli júrgizbegeni málim boldy. Sonyń biri – «Salamatty Qazaqstan» baǵdarlamasynan shıkilik shyqty. 2012-2016 jyldarǵa arnalǵan qaterli isikke shaldyqqandardy ońaltý isi de oıdaǵydaı atqarylmaǵan. Jalpy aıtqanda, bıýdjet pen basqa da mindetti isterdiń tıisti dárejede oryndalmaýynan 74 mlrd. teńgeniń zań buzýshylyǵy anyqtalǵan eken. Al jyl ótken saıyn osy salanyń bıýdjetin ońtaılandyrý máselesi ótkir kúıinde qalyp otyr. Jumysty biryńǵaılaýǵa arnalǵan jáne syrqattardy emdeý jónindegi qujattar negizgi talaptarǵa sáıkes kelmeıdi. Tipti bir jyldary jazylǵan qujat mátinindegi sózder áli kúnge deıin qaıtalanyp jazylýda.
Zań júzinde belgili bir syrqat túrlerine tegin medısınalyq kómek kórsetiletini belgili.Biraq, osyǵan baılanysty 179 kemshilik anyqtalypty. Densaýlyq salasyna arnalǵan nysandardy maqsatsyz salý faktisi de oryn alǵan. Sonyń saldarynan respýblıkamyzdaǵy 9 oblysta quny 830 mln. teńgeniń qural-jabdyqtary kádege jaratylmaı tur. Qurylysty salýǵa josparlanǵan qujattardan da shıkilik anyqtaldy.
Respýblıkamyzdaǵy medısına salasyna kadrlar daıarlaıtyn 6-ǵa jýyq oqý oryndarynyń oqý baǵdarlamasy men oqytýshylyq quramy talapqa sáıkes kelmeıdi. Sonymen birge, jergilikti jerdegi medısına nysandary qyzmetkerlermen jetkilikti qamtylmaǵan. Esep komıteti osy jumystardyń durys júıelenbegenin Densaýlyq saqtaý mınıstrligi tarapynan baqylaýdyń bolmaýymen baılanystyrdy. Osy tekserýden keıin ǵana 53 adam ákimshilik jáne 36 adam tártiptik jaýapkershilikke tartylǵan.
Baqytbek Keneshuly.
Derekkóz: Kapital.kz