Mindet aıqyn – halyqtyń jaǵdaıyn jaqsartý

Eldiń básekege qabileti shyńdalatyn kezeń

Qazirgi tańda, Prezıdent aıt­­qandaı, memleket aldynda áleýmettik-ekonomıkalyq turaq­­tylyqty, ornyqty damýdy, halyqtyń áleýmettik ahýa­lyn arttyrýdy, azamat­tardy ja­ńa jaǵdaılarǵa beıim­deýdi qam­tamasyz etý, el bir­ligin, qaýip­sizdikti ny­ǵaıtý, ultymyz­dyń rý­hyn kóterý basty mindet bo­lyp tur.

Joǵaryda atalǵan maqsat-min­detter óte aýqymdy. De­gen­­men olardy eńserýge eli­miz­­diń múm­kindigi jetedi. Mem­leket basshysy osy oraıda: «Mem­leket tarapynan áleý­mettik sa­ladaǵy jáne ekonomıkany qol­­daýǵa baǵyttalǵan barlyq min­dettemeler oryndalatyn bo­la­dy. Bul maqsatqa Ult­tyq qor­dan 1 trıl­lıon teńge bólinýde. Áleý­met­tik tó­lemderdi ındeksasııalaý ju­­mysy jalǵasyn tabady. Osy baǵytta 2023 jylǵa deıin shamamen 1 trıllıon teńgeden astam qar­­jy bólý josparlanyp otyr», dedi.

Jalpy, sarapshylar aıtyp júr­gendeı, memleketterdiń bá­se­kelestik qabileti, damý ba­­ǵy­tyndaǵy qadamdary daǵ­da­rystar men ýaqyt engiz­gen ózgerister kezeńinde shyń­dalady. Osyndaı syndardan súrinbeı ótken, ózin shyńdaı bilgen el ǵana kóshbasshy memleketter qatarynan kórinedi.

Atalǵan Joldaýda kórse­tilgen mindetter kún tárti­bi­ne ýaqtyly ári oryndy qoıy­lyp otyr. Osy tusta Joldaý ha­qyn­da qoǵam qaıratkeri Jaq­sybek Qulekeevtiń pikirin kel­tire keteıik. «Prezıdent Q.Toqaevtyń el damýynyń bar­lyq salasyn qamtı otyryp, strategııalyq baǵyttarymyzdy aıqyndaı tús­ken bıylǵy ke­zekti Joldaýy halyqtyń kó­keıinde túıindelip, kópten sho­ǵyrlanyp, sheshýin kútip júr­gen ózekti máselelerdiń bi­razynyń jýyq arada saıası arenada sheshimin tabatynyna senim uıalatqan qubylys boldy. On bir tarmaqtan turatyn Joldaýdyń bas­ty mindeti – memlekettik bıliktiń halyq al­dyndaǵy jaýapkershiligin arttyra otyryp, qoǵamnyń ótkir talabyna saı keletin utymdy, naqty nátıje beretin, elge paıdasy mol sheshimder qabyldaýǵa jumyldyrý. Ol sheshimder meılinshe ádil bolyp, halyqtyń ál-aýqatyn arttyrýǵa baǵyttalýy jáne daryndy jastarǵa jol ashatyn tıimdi áleýmettik sa­tylardyń ornyǵýyna sebep bolýy tıis. О́ıtkeni elimizde sońǵy jyldary umyt bola bastaǵan ádiletti qoǵam qaǵıdasy, zań ústemdigi, azamattardyń qaýipsizdigine kepildik berý sekildi uǵymdar jańa turǵyda aıtylyp otyr. Aı­tary joq, kez kelgen naryq­tyq qaǵıdattarǵa negizdelgen qoǵam turaqty damýy úshin  sol eldiń belsendi, ozyq oıly aza­mattarynyń qabileti men múm­kindikterin tolyq paıdalanýyna meılinshe jaǵdaı jasalýy kerek. Al onyń kepili – zań ústemdigi, saıa­sı bılikten táýel­siz sot júıesi, tıimdi aza­ma­ttyq qoǵam ınstıtýttary jáne  keń aýqymda aıty­latyn memlekettegi saıası turaq­ty­lyq. Elde osy atalǵan kate­gorııalar qalyptasyp,  bılik pen qoǵamnyń arasyn­da turaqty dıalog oryn al­ǵan jaǵdaıda ǵana memleket turaqty damýdyń dańǵyl jolyna túsetini ras jáne bul – aksıoma. Sondyqtan da bul Jol­daý osynysymen qundy», deıdi J.Qulekeev.

Basty ustanym – áleýmettik ádilettilik ornatý

Prezıdent Táýelsizdik kú­nine oraı Memlekettik na­gradalar men syılyqtar tap­syrýǵa arnalǵan saltanatty rásimde Joldaýda qozǵalǵan máse­lelerdi taǵy da ekshep, alda tur­ǵan mindetterdi pysyqtaı tústi. «Biz qıyndyqtar men keder­gilerge qaramastan, alǵa ilge­rileýdi jalǵastyramyz», degen Memleket basshysy eko­nomıkalyq qýatty, áleý­met­tik ádil jáne berik tiregi men progresshil qundylyqtary bar ashyq qoǵam quryp jatqa­ny­myzdy, tutas dúnıeniń ty­nys-tirshiligi ózgergen, pan­demııa búkil álemdi synǵa alǵan qazirge kezde bar kúsh-jigerimizdi jumyldyryp otyr­ǵanymyzdy eske saldy. Epı­demııaǵa qarsy keshendi is-sharalar úshin 350 mıllıard teńgeden astam qarjy bólin­genin jetkizgen Prezıdent ózi­niń basty mıssııasy – áleýmettik ádilettilik jáne halyqtyń ál-aýqatyn arttyrý ekenine ekpin berdi. Q.Toqaevtyń aıtýynsha, bıyl 4 mıllıonǵa jýyq azamattyń zeınetaqysy men áleýmettik járdemaqylarynyń kólemi ulǵaıdy, áleýmettik saq­tandyrý tólemderi ortasha 50%-ǵa kóterildi, az qamtylǵan otbasylardaǵy 500 myńnan asa bala úshin kepildendirilgen áleýmettik paket engizildi. Pandemııa kezindegi qıyndyq­tarǵa qaramastan, el qambasy astyqqa toldy. Jańa joldar salyndy, turǵyn úıler men ınfraqurylymdyq nysandar boı kóterdi. Basshylardyń jańa býynyn daıyndaýǵa basa mán berildi.

Memleket basshysy óz só­zinde Qazaqstannyń naqty bá­se­kege qabilettiligin joǵa­ry­latý úshin barlyq kúsh-jiger men resýrstardy jumyldyrý, ult­tyq múddemizdi berik qor­ǵap, ekonomıkada, áleýmettik salada, ekologııada aýqymdy júıeli sharalar keshenin júzege asyrýdy jalǵastyrý, ádiletti jáne teń múmkindikter qaǵıdattaryn ilgeriletý syndy basqa da min­det­terdi atady.

Osy oraıda Qazaqstannyń Eńbek Eri Murat Qaıyrgeldın Prezıdent Qasym-Jomart Toqaevtyń Táýelsizdik kúni qar­sańynda ótken Memlekettik nagradalar tapsyrý rásiminde sóılegen sózin qoldaı otyryp, óz pikirin bylaı sabaqtady: «Prezıdent qıyndyqtar men kedergilerge qaramastan, alǵa ilgerileýdi jalǵastyramyz dedi. Bul rette elimizdi jahandyq daǵda­rystan alyp shyǵý úshin kóp is tyndyrylǵanyn atap ótý kerek. Memleket bas­shy­­sy aıtqandaı, júıeli ju­­mys­­tardyń nátıjesinde eko­nomıkaǵa qatysty teris bol­­jamdardy joqqa shyǵaryp, in­dettiń zardaby azaıdy. Der kezinde qabyldanǵan sharalar­dyń arqasynda ahýal birshama turaqtandyryldy. Jahandyq dúrbeleńge qaramastan, mem­lekettiń irgesi myǵym, tuǵyry bekem ekenin dáleldeı bildik. Osynyń bári ortaq maqsat úshin judyryqtaı jumylyp, eńbek etýdiń jemisi».

Aıta keteıik, Prezıdent keler jyldy «Təýelsizdiktiń 30 jyldyǵy» dep jarııalaǵany belgili. Osynaý bıik beles – táýelsizdiktiń otyzynshy jylynda halqymyz buǵan deıin qol jetkizilgen tabystarymyzdyń eselene túskenine, túıtkildi máselelerdiń sheshimin tapqa­nyna ashyq aspan, beıbit kúnniń aıasynda kýá bola bergeı!