Elordadaǵy Kongress-Hollda táýelsizdik merekesine arnalǵan «Jyryń bolyp tógilemin, elim!» atty respýblıkalyq aqyndar aıtysy ótti. «Nur Otan» partııasynyń qoldaýymen ótkizilgen aıtýly dodaǵa elimizdiń túrli aımaqtarynan kelgen saıdyń tasyndaı iriktelgen on aqyn qatysyp, baqtaryn synady.
Elordadaǵy Kongress-Hollda táýelsizdik merekesine arnalǵan «Jyryń bolyp tógilemin, elim!» atty respýblıkalyq aqyndar aıtysy ótti. «Nur Otan» partııasynyń qoldaýymen ótkizilgen aıtýly dodaǵa elimizdiń túrli aımaqtarynan kelgen saıdyń tasyndaı iriktelgen on aqyn qatysyp, baqtaryn synady.
Aıtysty quttyqtaý sózben ashqan «Nur Otan» partııasy Tóraǵasynyń birinshi orynbasary Baýyrjan Baıbek partııa óziniń jańa Caıası doktrınasynda ulttyq dástúrimizdi, tól mádenıetimizdi, rýhanııatymyzdy óte joǵary orynǵa qoıyp otyrǵanyn aıta kele, Elbasy saıasatynyń arqasynda egemendi el bolyp damyǵan elý memlekettiń qataryna endik, dedi. Sondaı-aq, ol tek kemshilikti ǵana emes, birlikti, beıbitshilikti, turaqtylyqty jyrlaý kerektigin de tilge tıek ete kele, «Nur Otan» partııasy aqyndarymyzdy qashanda qoldaıtyndyǵyn atap kórsetti.
Sonymen, alǵashqy bolyp sahnaǵa Muhtar Nııazov pen Jandarbek Bulǵaqov kóterildi. Jalyndaǵan jas aqyndar aıtysy jıylǵan jurtshylyqty ózderiniń utqyr sózderimen tamsantty. Jalpy, ótkizilip otyrǵan bul aıtystyń óz erejesine saı aqyndar shek tastaý arqyly ekranda belgilengen arnaıy tapsyrmaǵa sáıkes aıtysty ary qaraı jalǵastyrdy. Bul joly olarǵa ótirik óleń aıtý tústi. Qos aqyn da bul synda baryn sala aıtysty. Osy tus Muhtar Nııazovtyń ótken jylǵy aıtystyń altyn dombyrasyn jeńip alǵanyn aıta keteıik.
Ekinshi jupta kezdesken Qanat Myrzahan men Dıdar Qamıevtiń sóz tartystary da tartymdy shyqty. Bularǵa óz aıtystarynan keıingi tapsyrma qaıym aıtys boldy. Tarynyń qaýyzyndaı tórt jol óleńge tolǵamdy oıdy syıdyrý áste ońaı emes. Alaıda, aqynnyń aqyndyǵy kóriner sátte Qanat pen Dıdar bul synnan súringen joq. Qaıymdasa aıtysty erkin jalǵastyrdy.
Úshinshi jup sahnaǵa shyqqanda kórermender yqylasy erekshe boldy. Bul joly jurtshylyq aldynda kópten beri kórinbeı júrgen belgili aıtysker Bekarys Shoıbekov shyqty. Onyń qarsylasy búginde ózindik oı oramymen kózge túsip júrgen Jaqsylyq Orynbasar edi. Jaqsylyq eldegi oralmandar máselelerinen oı tolǵasa, Bekarys óziniń tolǵamdy oılary men utymdy jaýaptarynan jańylǵan joq. Qos aqyn óz aıtystarynan soń ekranda kórsetilgen sýretti jyrlady.
Sara Toqtamysova men Nurmat Mansurov tórtinshi jupta dodaǵa tústi. Olar «Biz úshin ne qymbat, ne arzan?» degen taqyryp tóńireginde oı tolǵady.
Sońǵy jup – Balǵymbek Imashev pen Aınur Tursynbaevany oqyrmanǵa tanystyryp jatýdyń qajeti bola qoımas. Jýyrda ǵana «Kil júırikte kim júırik?» atty respýblıkalyq aqyndar aıtysynda bas júldeni ıelengen Aınur da, utymdy sóz ben ázilge bura aıtysýda qamshy saldyra qoımaıtyn Balǵymbek te jumbaq aıtystyń kórigin qyzdyra otyryp, kóp kóńilinen shyqty.
Qazylar alqasynyń uıǵarymymen aqtyq saıysqa Dıdar Qamıev, Nurmat Mansurov, Jandarbek Bulǵaqov, Balǵymbek Imashev joldama aldy. Dodadaǵy erekshelik sol, bul joly aqyndarymyz Qulmambet aıtysynyń úlgisimen tórteýi de qatar otyryp aıtysty. Osy tus zal toly halyq Jandarbekke dem berýmen boldy.
«Júırikten júırik ozar jarysqanda» demekshi, qazylar alqasynyń sheshimimen Jandarbek Bulǵaqov osy aıtystyń bas júldesin ıelendi. Oǵan saıysqa taǵaıyndalǵan úsh mıllıon teńge men altyn dombyra tabys etildi. Al birinshi oryn Dıdar Qamıevke buıyrdy. Ol eki mıllıon teńge oljalady. Ekinshi júlde – bir mıllıon teńgeni Nurmat Mansurov enshilese, júldeli úshtikti Balǵymbek Imashev jeti júz elý myń teńge syılyqpen qorytyndylady. Sonymen birge, aıtysqa qatysqan barlyq aqyndarǵa bes júz myń teńgeden syı-sııapat jasaldy.
Uıymdastyrýshylar aıtys ónerine kóp eńbek sińirgen memleket jáne qoǵam qaıratkeri Myrzataı Joldasbekov pen aqyn Júrsin Ermanǵa da qurmet kórsetip, shapan japty. Sondaı-aq, jaqynda ómirden ozǵan aıtys dúldúli Esenqul Jaqypbekov atyndaǵy júldeni «QazAıtys» saıtynyń jetekshisi Ularbek Nurǵalym Muhtar Nııazovqa tabystady.
Shara sońynda qazylar alqasynyń tóraǵasy, Parlament Májilisiniń depýtaty Aldan Smaıyl barlyq aqyndarǵa sáttilik tiledi.
Ábdirahman QYDYRBEK,
«Egemen Qazaqstan».
Sýretterdi túsirgen Sultan SEIITOV.