Juma kúni Almaty qalasy ákimdiginiń uıymdastyrýymen KSRO halyq ártisi Sholpan Jandarbekovanyń qurmetine ornatylǵan eskertkish taqtanyń saltanatty ashylý rásimi bolyp ótti.
Juma kúni Almaty qalasy ákimdiginiń uıymdastyrýymen KSRO halyq ártisi Sholpan Jandarbekovanyń qurmetine ornatylǵan eskertkish taqtanyń saltanatty ashylý rásimi bolyp ótti.
Memlekettik syılyqtyń laýreaty Sholpan Jandarbekovanyń esimin máńgi este qaldyrý maqsatynda qaıratkerdiń sońǵy jyldary turǵan úıine ornatylǵan eskertkish taqtanyń ashylý rásimine mádenıet qaıratkerleri, zııaly qaýym ókilderi, Sh. Jandarbekovanyń shákirtteri jáne týystary qatysyp, estelikter aıtty.
О́nerge óshpes talantymen qyzmet etken Jandarbekova Sholpan Isabekqyzy 1922 jylǵy 1 qańtarda Qaraǵandy oblysynyń Qarqaraly aýdanynda dúnıege kelgen. Almaty teatr-kórkemsýret ýchılıshesin bitirgen. M. Áýezovtiń «Eńlik-Kebegindegi» Eńlik, «Qara qypshaq Qobylandydaǵy» Qurtqa, «Aıman-Sholpandaǵy» Sholpan, «Túngi saryndaǵy» Júztaılaq, «Abaı áni» kınofılmindegi Maǵysh jáne t.b. obrazdardy somdaǵan. S.Júnisovtiń «Ajar men ajalynda» Ajar rólin sheber oryndaǵany úshin Qazaqstannyń Memlekettik syılyǵyn alǵan.
J.Molerdiń «Sarańynda» Marıanna, Ý.Shekspırdiń «Otellosynda» Dezdemona, Iа.Galannyń «Tań aldyndaǵy mahabbatyndaǵy» Paraska, M.Kaorýdyń «Shyǵystaǵy bir beıbaǵynda» Keı syndy rólderimen óz zamanyndaǵy kórermenderdiń ólsheýsiz iltıpatyna ıelengen Sholpan apamyz ónerge qaltqysyz berilip, ony jan-tánimen súıgen erekshe jan. Talantty aktrısanyń ulttyq ónerge sińirgen eńbegi elenip, Qazaqstannyń jáne KSRO-nyń halyq ártisi ataqtary berilgen.
Úlken daryn ıesi, eki márte «Eńbek Qyzyl Tý» ordenimen jáne kóptegen medaldarmen marapattalǵan Sh.Jandarbekova bar túıgen-toqyǵanyn keler urpaqqa qaldyrý maqsatynda oqytýshylyq qyzmetpen de aınalysty. Almaty memlekettik óner ınctıtýtynda, Qazaq ulttyq óner akademııasynda dáris oqyp, shákirt tárbıeledi.
Aınash ESALI,
«Egemen Qazaqstan».
ALMATY.
Sýretti túsirgen Bersinbek SÁRSENOV.