2020 jyldyń 1 qarashasyndaǵy jaǵdaı boıynsha Almaty qalasynda 196 549 kásipkerlik sýbektisi tirkelgen. 2019 jyldyń dál osy ýaqytymen salystyrǵanda bul 3,5 paıyzǵa ósim bolǵanyn kórsetedi. Mundaı derekti arnaıy brıfıng ótkizgen qalalyq kásipkerler palatasynyń dırektory Aıtýar Qoshmambetov aıtty.
Onyń aıtýynsha, jalpy bıznes sýbektisindegi jeke kásipkerlerdiń úlesi 60 paıyzdy quraıdy. Sanǵa shaqqanda 120 myńǵa jýyq. Shaǵyn jáne orta bıznes ıeleri 40 paıyz shamasynda. Byltyrǵy III toqsannyń qorytyndysy boıynsha 107 kásiporyn jabylǵan. Onyń 29-y – orta, 178-i shaǵyn kásipkerlik nysandary eken.
– Sáýir men qyrkúıek aralyǵynda kásipkerler sany birshama ósti. Tirkelgen 5 081 kásiporynnyń 879-y – jeke kásipkerler bolsa, 4 000-nan astamy zańdy tulǵalar. Bizdiń oıymyzsha, «Bastaý bıznes» jobasy arqyly kásipkerler sany artyp otyr. Atalǵan joba aıasynda byltyr 2 600 adam oqyp, 1 334-i óz kásipterin ashty. Jalpy 1 705 grant bólingen bolatyn. Granttyq jáne ákimdik baǵdarlamalary boıynsha qolǵa alynǵan kez kelgen kásipkerlik maqsatty qoldaýǵa daıynbyz. Shaharda, ásirese, saýda jáne qyzmet kórsetý salasy basymdyqqa ıe. Bizdiń jobany oqyp kásip bastaǵandardyń kóbi – atele, fotosalon, dámhana, naýbaıhana bıznesterimen aınalysýda, – deıdi spıker.
1-14 jeltoqsan aralyǵynda kásipkerler palatasy júrgizgen saýaldamaǵa qatysqan 6 myńǵa jýyq kásipkerdiń teń jartysy qarjylyq turaqsyzdyqqa tap bolyp otyrǵandaryn aıtqan. 4 paıyzy – tabystan aıyrylǵan, 24 paıyzy – suranys azaıýyna tap bolǵan, 40 paıyzy – arenda qunyn, 27 paıyzy – kommýnaldyq tólemdi, 21 paıyzy – salyq tóleýden qınalǵan, 19 paıyzy qyzmetkerlerine jalaqy berý turǵysynan qıyndyqqa ushyraǵan. Al 12 paıyzy jaqyn arada kásipterin jabýǵa májbúr ekenderin jarııa etken.
Aıtýar Qoshmambetovtyń aıtýynsha, bıznes ıeleri karaoke-zal, fýd-kort, boýlıng, mektep ashanasy, balalar oıyn-saýyq ortalyǵy, bankter zaldarynyń ashylýyn surap otyr. Qazirgi kezde qalada sıfrly monıtorıng júrgizýdiń qanatqaqty jobasy qolǵa alynypty. Iаǵnı, sanıtarlyq talaptardy saqtaýdy baqylaıtyn beınekameralar ornatylady. Bul bastama jańa jyldan bastap iske qosylmaq.
ALMATY