Buǵan deıin áleýmettik jelide buryn QazUÝ-ǵa tıesili jer jeke tulǵaǵa berildi degen málimet paıda bolǵan edi. Ýnıversıtet ákimshiligi bul bul aıyptaýǵa resmı jaýap berdi, dep habarlaıdy Egemen.kz
Osyǵan baılanysty talqylanyp jatqan jer máselesine qatysty túsinik berý qajet dep sanaımyz. Birinshiden, ýnıversıtet te, QazUÝ-dyń laýazymdy tulǵalary da jer ýchaskesiniń bir bóligin úshinshi tulǵalardyń paıdasyna ıelikten shyǵarýǵa kelisim bermedi jáne jer ýchaskesin basqa tásilmen bólýge qatysqan joq. Aıta ketý kerek, barlyq múlik pen jer memlekettik aktıv bolyp sanalady, sondyqtan JOO-da olardy ıelený, paıdalaný jáne bılik etý quqyǵy joq, - delingen QazUÝ resmı saıtynda.
QazUÝ ókilderi QR Jer Kodeksiniń 43, 44-1 jáne 48-baptary, sondaı-aq «Memlekettik múlik týraly» QR Zańynyń 4-babynyń 1-tarmaǵy memlekettik múlikti, onyń ishinde jer ýchaskelerin basqarý, berý/satý salasyndaǵy memlekettiń quqyqtary men mindetterin belgileıtinin atap ótti.
«Osy zańdardyń baptarynda sheshimder qabyldaý tártibi zańnamalyq túrde kórsetilgen, sondaı-aq memleketke tıesili múlik pen jerge qatysty kez kelgen jeke sheshim qabyldaý alyp tastalǵan. "Demek, ýnıversıtet basshylyǵy óz qalaýy boıynsha Memlekettik múlik pen jerdi berýdi jeke ózi júzege asyra almaıdy», deıdi JOO ókilderi.
Budan bólek, QazUÝ basshylyǵynyń 2017 jyly jer ýchaskelerin ıelikten shyǵarý boıynsha jerge ornalastyrý jobasyn ázirlemegeni, bekitpegeni jáne oǵan qatyspaǵany aıtylady.
«Osylaısha, áleýmettik jelilerdegi QazUÝ basshylyǵy jerdi berýge qatysy bar degen jazbalar shyndyqqa sáıkes kelmeıdi jáne ol JOO-nyń bedelin túsirýge baǵyttalǵan. Joǵaryda aıtylǵandarǵa baılanysty qazirgi ýaqytta quqyq qorǵaý organdaryna sharalar qabyldaý týraly ótinish joldandy», dedi QazUÝ ókilderi.