Qurmanǵazy atyndaǵy Qazaq memlekettik akademııalyq halyq aspaptary orkestriniń «Dara tulǵa» atty merekelik konserti Elbasyna arnaldy.
Qurmanǵazy atyndaǵy Qazaq memlekettik akademııalyq halyq aspaptary orkestriniń «Dara tulǵa» atty merekelik konserti Elbasyna arnaldy.
Tuńǵysh Prezıdent kúni búkil elimiz boıynsha keńinen atalyp ótilgeni belgili. Biraq osy oraıdaǵy yqylasty kóńil lúpili, izgi nıetterden týǵan qurmet tolqyny, ıgi sharalar tasqyny tolastar emes. Kúı atasy Qurmanǵazy atyndaǵy qazaq óneriniń qarashańyraǵy óziniń sekseninshi maýsymynyń shymyldyǵyn eldigimizdiń mártebesin bıiktetken osynaý ulyq merekeni aıshyqtaǵan tamasha baǵdarlamamen ashýy eleýli oqıǵaǵa aınaldy.
Iá. Dara tulǵa. Konsert taqyrybynyń altyn arqaýy, kúmis tini elimizdi álemge tanytqan, Táýelsizdiktiń kók baıraǵyn alǵash jelbiretken qadirmendi Elbasymyz bolýy da zańdy. Memlekettik syılyqtyń laýreaty, aqyn Marfýǵa Aıthojına jańa maýsymdy orkestrdiń sekseninshi kóktemine balady. О́leńmen órnektelgen óz quttyqtaýyn:
«Sekseninshi qys oraldy, ulpa qarǵa bólenip,
Prezıdent kúni – álem jurty aıtyp jatyr tórelik.
Seksendegi Qurmanǵazy orkestri qosylyp,
«Dara tulǵa» ánin aıtyp berelik», – degen syrly shýmaqtarmen jelpindire tústi. El Prezıdentiniń bekzat qasıetterin kestelegen osynaý tamasha ánniń, onyń turpatty óleńiniń de avtory Marfýǵa aqyn. Orkestrdiń jańadan taǵaıyndalǵan jas dırektory Nurǵısa Daýeshovtiń Elbasyna arnalǵan búkil konserttik baǵdarlamany osy án ataýymen ataýy tapqyr sheshim bolyp, jaqsy jarasyp turǵandaı.
Merekelik konsert Elbasynyń táýelsiz memleket qurýdaǵy eren eńbegin aıshyqty túrde beınelep kórsetkendeı áser qaldyrdy. Keshte Nursultan Ábishulynyń halyqqa keńinen tanymal «Úshqońyr», «Tarıh tolqynynda», «Astana», «Gorod moı» syndy shyǵarmalary sátimen oryndaldy. Jıylǵan qaýym orkestrdiń bas dombyrashysy, Memlekettik «Daryn» jastar syılyǵynyń laýreaty Batyrjan Myqtybaev, halyqaralyq jáne respýblıkalyq konkýrstardyń laýreattary Bereke Eńkebaeva, Farhat Kýbıev, Almas Altynbekov, Baqytgúl Bekbergenova, Dıdar Káden jáne «Ańsar» kvarteti syndy óner maıtalmandaryna súısine qol soqty.
Orkestrdiń bas dırıjerligine jańadan kelgen halyqaralyq konkýrstardyń laýreaty Arman Júdebaevtyń ózindik órnek-qoltańbasy, jańa tynys erekshe náshpen, bólekshe órede quıqyljı shalqyǵan kúılerden baıqalyp-aq turdy. Qazaqstannyń eńbek sińirgen qaıratkeri Janas Bekenturov pen halyqaralyq konkýrstardyń laýreaty Qarshyǵa Ahmedııarov óneri de qaýymdy qýanyshqa bóledi.
Konsertti qazaq rýhyn tanytar «Saryarqa» kúıimen qatar, úzeńgi qaǵystyra túıindegen «Dara tulǵa» ánin Qazaqstannyń eńbek sińirgen ártisi, Memlekettik syılyqtyń laýreaty Shahımardan Ábilov taý samalyndaı taza, barqyt kúıli bıpaz daýyspen kelistire shyrqady. Keń tynysty kemel ánde el baǵyna týǵan Er beınesi tómendegideı óleń joldarymen ádemi ashyldy.
Jańǵyrtyp qalasyn da, dalasyn da,
Elińdi bastap júrsiń jańa shyńǵa.
Aman bol, bar qazaqtyń baqyty úshin,
Zamannan asyp týǵan dara tulǵa.
Qorǵanbek AMANJOL,
«Egemen Qazaqstan».
Almaty.