Qyzylorda oblysy Polısııa departamentiniń Aral aýdandyq polısııa bólimine 39 jastaǵy jergilikti turǵyn habarlasyp, aýyl mańynda jaıylyp júrgen jylqysyn urlaýǵa árekettengender týraly málimdedi, dep habarlaıdy Egemen.kz
Aryzdanýshy belgisiz adamdardyń jylqyny atyp alýǵa oqtalǵanyn aıtypty. Polısııa qyzmetkerleri jaıylymǵa baryp, oqıǵa ornyn tekserý barysynda belgisiz azamattardyń aıaq kıim izderin tabady.
Jedel-izdestirý sharalary barysynda bul qylmysqa 31 jastaǵy aýyl turǵynynyń qatysy bar ekendigi anyqtaldy. Janýarǵa myltyq kezegen ol qylmystyq áreketin belgisiz sebeptermen sońyna deıin jetkize almaı, oqıǵa ornynan qashyp ketken.
Atalǵan derek boıynsha Qazaqstan Respýblıkasynyń Qylmystyq kodeksiniń 24-babynyń úshinshi, 188-1 babynyń 1-bóligimen sotqa deıingi tergep-tekserý júrgizilýde. Oqıǵanyń mán-jaıy anyqtalýda.