Almaty qalasynda jaımabazarlardy retke keltirý máselesi qolǵa alyndy. Osy baǵyttaǵy jumystar eki jyl kóleminde júzege asyrylýy tıis. Bul týraly Nur.kz habarlady.
«Biz jaımabazarlardy retteýge arnalǵan jobany eki jyl ishinde júzege asyrýymyz kerek. Birinshi kezekte Severnoe kolso kóshesin bosatýymyz kerek. Ár beısenbi saıyn «baraholka» qurylysyna jaýapty jeke kásipkerlerdi shaqyryp, kelissózder júrgizýdemiz», - deıdi sáýlet jáne qala qurylysy basqarmasynyń bastyǵy Ǵabıt Sadyrbaev.Onyń aıtýynsha, qazirgi kezde «baraholka» aýmaǵyndaǵy alpys tórt bazardyń tórteýiniń ǵana («Bolashaq», «Saýran», «Stroı-sıtı», «Sálem») jobalyq jospary bar. Al qyzyl lınııada salynǵan bazarlar buzylatyn bolady. Sonymen, josparǵa sáıkes, «Qulager» bazary buzylyp, orny tazartylyp jatyr. Sebebi, jańa jobada qyzyl syzyqtyń boıynda turǵan bazarlardyń 130 metrge keıinge shegerilýi kerektigi kórsetilgen.
«Soltústik aınalymda qyzyl syzyqta turǵan aımaqty tazartamyz. Ornyna zamanaýı saýda úıleri salynady. Árbir keshenniń janynan ashyq kólik turaqtary men syıymdylyǵy 21 myń oryndyq kópqabatty parkıng salynbaqshy. Bul keshenderdiń jertólesi parkıng jáne qoıma retinde paıdalanylady»,-dedi Soltústik aınalym jobasynyń avtory Altaı Satybaldıev.
Jobada qarastyrylǵan jaıly keshenniń qurylysyna ázirge bıýdjetten 14 mln.teńge bólinipti. Talapqa saı kelmeıtin qala ishilik 34 saýda ornyn retke keltirý isi de kún tártibinde tur. «Qala boıynsha 74 saýda orny bar. Sonyń ishinde Áýezov aýdanynda 4, Almaly aýdanynda 6, Alataý aýdanynda 10, Bostandyq aýdanynda 4, Jetisýda 7, Medeýde 1, Túrksibte 2 saýda ornynyń turǵan jeri bizdiń bas jobaǵa sáıkes kelmeıdi», – dedi sóz oraıynda qurylys jáne sáýlet basqarmasynyń bastyǵy Ǵ.Sadyrbaev.
Biz jergilikti bılik ókilderimen áńgimelesý barysynda soltústik aınalymdaǵy «Adem», «Rahat», «Iаlıan» sııaqty sońǵy jyldary salynǵan bazarlar buzylmaıtynyn bildik. Olarǵa kúrdeli jóndeý jumystary júrgiziledi eken. Jalpy, qalanyń soltústik bóligindegi aınalma joldy qalypqa keltirýge bar kúsh jumyldyrylady.
Baqytbek Keneshuly.
Derekkóz: Nur.kz