Keshe Prezıdent janyndaǵy Ortalyq kommýnıkasııalar qyzmetiniń uıymdastyrýymen Sochı qalasynda 2014 jyly ótkiziletin XXII qysqy Olımpııa oıyndaryna daıyndyq barysy týraly baspasóz máslıhaty ótkizildi.
Keshe Prezıdent janyndaǵy Ortalyq kommýnıkasııalar qyzmetiniń uıymdastyrýymen Sochı qalasynda 2014 jyly ótkiziletin XXII qysqy Olımpııa oıyndaryna daıyndyq barysy týraly baspasóz máslıhaty ótkizildi.
Kún tártibindegi máselege baılanysty Prezıdent janyndaǵy Ortalyq kommýnıkasııalar qyzmetiniń resmı ókili Altaı Ábıbýllaev qysqasha túsinikteme berip ótti. «Sport qaı kezde de óz mańyzyn joımaǵan. Al elimiz táýelsizdik alǵan jyldary onyń tynysy keńeıip, sportshylarymyzdyń mereıi ústem boldy. Búginde el aımaǵynda ótkizilip jatqan jarystardan bólek, Olımpıadaǵa qatysýǵa jol ashyldy. Osy joly keler jyly Sochı qalasynda ótkiziletin qysqy Olımpıadaǵa daıyndyq barysyn pysyqtaýdyń jóni kelip tur», – dedi ol.
Sport jáne dene shynyqtyrý isteri agenttiginiń tóraǵasy Tastanbek Esentaev joǵaryda atalǵan máselege baılanysty birqatar isterdiń qolǵa alynǵanyn atap ótip, aldaǵy mindetterge toqtalyp ótti: «Tórt jylda bir ret ótkiziletin Olımpıada álemdik sporttyń eń bıik shyńy desek qatelespeımiz. Sondyqtan, bizdiń agenttik keler jyly Sochıde ótkiziletin jarysqa qazirden bastap daıyndyq jumysyn bastap ketti, – dep atap ótti ol. – Aldymen, osy jumysty úılestirý úshin respýblıkalyq operatıvtik shtab quryldy. Osynyń negizinde túıindi máselelerdi sheshýge qadam jasaldy».
T.Esentaev sóz oraıynda Sochıdegi Olımpıadaǵa álemniń 80 elinen 5 myńnan astam sportshy men ár salanyń ókilderi qatysatynyn málimdedi. Sonymen birge, sporttyń 15 túri boıynsha 98 medal jıyntyǵy sarapqa túsetinin bildik. «Lısenzııalyq kezeńniń aıaqtalýyna deıin 10 sport túrinen 40 lısenzııa alýdy josparlap otyrmyz. Elimizdiń olımpıalyq komandasy quramyn jasaqtaý isi kelesi jyldyń qańtar aıyna deıin jalǵasady. Onda sportshylarymyzdyń dene daıyndyǵy men psıhologııalyq jaǵdaıy, sondaı-aq, irikteý kezeńderiniń jáne dopıngke qarsy baqylaýdyń qorytyndylary eskeriletin bolady. Jalpy, biz jalpy komandalyq esepte 20-23-shi orynǵa shyǵýdy maqsat tutyp otyrmyz», – dedi kelesi kezekte T.Esentaev.
Ázirge Olımpıadaǵa lısenzııa alǵandar tizimine Shyǵys Qazaqstan, Aqmola, Pavlodar, Batys Qazaqstan, Aqtóbe, Qaraǵandy oblystary men Almaty qalasynyń sportshylary engizilgen. Al ulttyq quramany daıyndaý úshin shetelden 17 maman shaqyrylǵan. Olar sporttyń 8 túri boıynsha (shańǵy tebý, bıatlon, mánerlep syrǵanaý, konkı, short-trek, frıstaıl jáne t.b) jattyǵý ótkizedi.
Baspasóz máslıhatynda taý shańǵysy sportynan, tramplınnen sekirýden, shańǵy qossaıysy men shana sportynan kenje qalǵanymyz ashyq aıtyldy. Degenmen, sporttyń bul túrlerinen lısenzııa alýdyń úmiti áli joǵalǵan joq. Osy tusta buqaralyq aqparat quraldarynda birneshe ret másele etip kóterilgen keıbir sportshylardyń Ánuranymyzdy jetik bilmeıtini de aıtylyp qaldy. Agenttik tóraǵasynyń sózine sensek, bul turǵydaǵy másele endigi jerde qaıta kóterilmeýi tıis. Sebebi, olardyń bárine birdeı arnaıy sabaq ótkizilip, kemshilik jónge keltirilgen.
Basqosýda Sochıde ótkiziletin qysqy Olımpıadaǵa elimizden baratyn 4 jýrnalıstiń resmı tirkeýden ótkeni málim boldy. Álem kóz tikken dúbirli dodaǵa sanaýly jýrnalıstiń qatysatyny áriptesterimizdi alańdatpaı qoımady. T.Esentaev qoıylǵan bul suraqtyń oryndy ekenin atap ótip, qosymsha 40-qa jýyq jýrnalıst qatystyrý jóninde kelissóz júrgizilip jatqanyn tilge tıek etti.
Sonymen, keler jylǵy Olımpıadaǵa ázirge elimizden 40 sportshy iriktelip alynǵan eken. Jalpy, oǵan qatysatyndardyń naqty sany keler jyly belgili bolady. Belgilisi, onda aldyńǵy qatardan kóringen sportshyǵa – 250 myń, ekinshi oryn alǵanǵa – 150 myń, úshinshi orynǵa 75 myń dollar tabys etiledi.
Ámirhan ALMAǴANBETOV,
«Egemen Qazaqstan».