Rýdnyı polıseıleri Qostanaıdaǵy 161/11 qonys kolonııasynan qashyp shyqqan eki qylmyskerdi ustady, dep habarlaıdy Egemen.kz
Kolonııa kezekshisi túzeý mekemesiniń aýmaǵynda eki sottalǵannyń joq ekenin 16 qańtar kúni keshki saǵat 21:00 shamasynda anyqtaǵan. Biri - 25, ekinshisi - 35 jastaǵy eki er adam kolonııanyń terezesin syndyryp, qashyp ketken.
Túzeý mekemesinde dabyl qaǵylyp, jeke quramǵa qashqandardyń túr-sıpaty túsindiriledi. Eki sottalýshy da buryn Rýdnyı qalasynda turǵandyqtan qalalyq polısııa basqarmasynyń qyzmetkerleri kúsheıtilgen qyzmet tártibine aýystyryldy.
«Jedel izdestirý is-sharalary kezinde qaladaǵy jaldamaly páterler, qylmyskerlerdiń dostary men týystary tekserildi. Sol kúni tártip saqshylary sottalǵandardy ustady», dep habarlady oblystyq polısııa departamentiniń baspasóz qyzmeti.
Qazir is sotqa berilip, sottalǵandar Qostanaı qalasynyń tergeý ızolıatorynda jatyr.