Búgin, Aqordada Qazaqstan Respýblıkasy Tuńǵysh Prezıdentiniń – Elbasynyń Memlekettik beıbitshilik jáne progress syılyǵyn, Ǵylym men tehnıka salasyndaǵy 2013 jylǵy memlekettik syılyqty, sondaı-aq «Qazaqstannyń eńbek sińirgen qaıratkeri» ataǵyn tapsyrý rásimi boldy. Bul týraly Aqorda. kz habarlady.
Memleket basshysy rásimge qatysýshylar aldynda sóılegen sózinde barshany elimizdiń eń basty merekesi – Táýelsizdik Kúnimen quttyqtady.
– Osynaý mańyzdy kún qarsańynda, qalyptasqan dástúr boıynsha, biz óz eńbekterimen erekshelengen azamattardy marapattaý rásimin ótkizemiz. Bul dástúrdiń mánin tereń túsiný kerek. Memlekettik nagradalarǵa elimizdiń damýyna eleýli úlesin qosqandar ıe bolady. Demek, bul – jekelegen azamattardyń emes, búkil halyqtyń eńbeginiń baǵalanýy, – dedi Qazaqstan Prezıdenti.
Nursultan Nazarbaev beıbitshilik pen tynyshtyqty óziniń eń basty baılyǵy sanaıtyn elimiz úshin Parlament Qazaqstan Respýblıkasy Tuńǵysh Prezıdentiniń – Elbasynyń Memlekettik beıbitshilik jáne progress syılyǵyn bekitkenin atap ótti.
– Bıylǵy jyly qurmetti nagrada bizdiń belgili otandasymyz, kórnekti aqyn, qoǵam qaıratkeri Oljas Omaruly Súleımenovke beriledi. Ol elimizdiń mádenı-rýhanı damýyna, halyqaralyq yntymaqtastyqqa zor úles qosty. Táýelsizdigimizdiń barlyq kezeńinde ol halyq birligin qoldady, shetelderde qyzmet atqara júrip Qazaqstandaǵy kelisimniń úlgisi jaıly aıtty. Oljas Súleımenovtiń basqarýymen «Nevada-Semeı» qozǵalysy ıadrolyq polıgondy jabý isine mańyzdy úles qosty, – dedi Memleket basshysy.
Qazaqstan Prezıdenti búgin taǵy birqatar azamattarǵa Ǵylym jáne tehnıka salasyndaǵy 2013 jylǵy memlekettik syılyq tapsyrylatynyn aıtty.
– Marapattaý – Táýelsizdigimizdi tuǵyrly etýge óz úlesin qosqan ǵalymdar qyzmetin laıyqty baǵalaý. Nagradaǵa álemdik deńgeıdegi matematıkalyq problemalar sheshimin usynǵan Tynysbek Kálmenovtiń eńbegi laıyq dep tanyldy. Sondaı-aq, memlekettik syılyq qazirgi medısınaǵa ozyq tehnologııalardy engizgen Serik Aqsholaqov bastaǵan Respýblıkalyq neırohırýrgııa ǵylymı ortalyǵynyń ǵalymdar tobyna beriledi. Olar densaýlyq salasyn damytýdyń jáne kásibı sheberlikterin arttyrýdyń arqasynda kóptegen azamattyń ómirin arashalap qaldy. Sonymen qatar, kartografııalaý salasynda mańyzdy nátıjelerge qol jetkizgen bir top geograf ǵalymdar marapattalady. Olardyń eńbeginiń arqasynda elimizdiń tamasha atlas kartalary jasaldy, – dedi Nursultan Nazarbaev.
Rásim sońynda Memleket basshysy laýreattarǵa sózin arnaı otyryp, olardy nagradalarymen taǵy da quttyqtap, elimizdi damytý jolyndaǵy qajyrly eńbekteri úshin alǵysyn aıtty jáne budan keıingi jumystaryna jemis tiledi.
– Men qazir laýreattardyń tek bir tobyna ǵana nagrada tapsyrdym, al búkil elimiz boıynsha joǵary ataqqa laıyqty basqa da azamattar meniń atymnan marapattalatyn bolady. Sizdermen birge barlyǵyn laıyqty eńbegi arqyly alǵan memlekettik nagradalarymen jáne syılyqtarymen quttyqtaımyn. Búgingi kúni el aldyndaǵy qyzmeti men qajyrly eńbegi úshin búkil respýblıka boıynsha bir jarym myńnan astam qazaqstandyq ordendermen jáne medaldarmen marapattaldy. Qazaqstannyń táýelsizdiktiń 22 jyly ishinde qol jetkizgen barlyq tabystary men jetistikterine barsha qazaqstandyqtardyń qyzmeti arqyly qol jetkizilip otyr, óıtkeni árkim óziniń jumysy salasynda respýblıkany damytýǵa mysqaldaı bolsa da úlesin qosty. Bizdegi ishki turaqtylyq, tózimdilik, túsiniktik pen dostyq elimizdi damytý úshin jahandyq jáne myzǵymas mánge ıe. Sondyqtan biz eń úzdik degen qazaqstandyqtardyń eńbegin baǵaladyq dep oılaımyn. Sizder Otanymyzdyń – Qazaqstan Respýblıkasynyń dańqyn shyǵara otyryp, basqalarǵa úlgi kórsetesizder dep senemin, – dedi Nursultan Nazarbaev.
O.Súleımenov Qazaqstan Respýblıkasy Tuńǵysh Prezıdentiniń — Elbasynyń Memlekettik beıbitshilik jáne progress syılyǵynyń laýreaty atandy.
Ǵylym men tehnıka salasyndaǵy 2013 jylǵy memlekettik syılyq Qazaqstan Respýblıkasy Bilim jáne ǵylym mınıstrligi Ǵylym komıteti «Matematıka jáne matematıkalyq modeldeý ınstıtýty» RMK bas dırektory T.Kálmenovke, Respýblıkalyq neırohırýrgııa ǵylymı ortalyǵy, Qazaqstan Respýblıkasy Bilim jáne ǵylym mınıstrligi «Parasat» ulttyq ǵylymı-tehnologııalyq holdıngi» AQ Geografııa ınstıtýty, sondaı-aq «Qazmorgeofızıka» AQ ǵylymı qyzmetkerleri tobyna tapsyryldy.
Sondaı-aq, rásim barysynda respýblıka aldyndaǵy zor eńbekteri úshin mádenıet pen óner salasynyń kórnekti ókilderi «Qazaqstannyń eńbek sińirgen qaıratkeri» qurmetti ataǵyna ıe boldy.