Gresııadaǵy qarjy daǵdarysyna baılanysty Afına qalasynyń myńdaǵan turǵyny úılerin otynmen jylytýda. Bul týraly ITAR-TASS habarlady.
Túngi mezgilde Gresııa astanasynyń aspanyn qoıý tútin basady. Myńdaǵan qala turǵyny kommýnaldyq qyzmet aqysynyń qymbattaýyna baılanysty úılerinde pesh jaǵa bastaǵan. Sebebi turǵyndar úshin tabıǵı gazdyń ornyna otyn paıdalaný áldeqaıda tıimdi bolmaq. Ásirese, jalaqysy tómen nemese daǵdarys saldarynan jumysynan aıyrylǵan azamattar úılerindegi elektr qýatynyń aqysyn tóleı almaı jaryqsyz qalýyna baılanysty otynmen jylynýdan basqa amaldary joq ekenin aıtyp qynjylady.
Gresııa ulttyq meteorologııa qyzmeti Afınada aýanyń qatty lastanyp, sonyń áserinen jelsiz sýyq aýa raıy týyndaǵanyn eskertti. Qorshaǵan orta, energetıka jáne klımattyq ózgeristerdi qorǵaý mınıstrligi zertteý júrgizý nátıjesinde Afınada aýa lastanýynyń deńgeıi bir kýbometrge shaqqanda 110 mıkrogrammdy quraǵanyn málimdedi. Mamandardyń aıtýynsha, bul kórsetkish ondaǵy aýanyń adam densaýlyǵyna zııan keltirip, onkologııalyq, tynys pen júrek aýrýlarynyń paıda bolýyna yqpal etý múmkindigin kórsetedi.
Aıdar О́risbaev.
Derekkóz: Itar-tass.com