60 myńǵa jýyq qujat elektrondy formatqa kóshirildi

Qazirgi tańda oblystyq mem­lekettik arhıvtiń aldynda turǵan mańyzdy mindettiń biri – shetelde, ásirese Reseıdiń ár aımaǵynda jat­qan óńir tarıhyna qatysty qujat­tardyń kóshirmelerin alyp, ólke tarıhynyń tolyqqandy de­rek­tik qoryn qalyptastyrý. Aq­parattandyrý, memlekettik qyz­met kórsetý jáne arhıv basqar­masynyń basshysy Azamat Qa­shıev­tiń aıtýynsha, oblysta bul maqsatta birqatar sharýa tyn­dyrylǵan.

«Arhıv – 2025» jobasyn jú­zege asyrý barysynda biz­diń mamandar 2019 jyldyń qa­zan aıynda Tatarstan Respýb­lıka­­synyń arhıvterinen Qazaq­stannyń, onyń ishinde tikeleı Qos­­tanaı oblysynyń tarıhyna­ qatysty 51 qujat taýyp ákel­di. Onyń bárine ǵylymı-teh­­nıkalyq óńdeý júr­gizilip, byl­­tyr memlekettik saq­taýǵa jiberildi. Bul qujattar búginde oblystyq arhıvtiń oqý zalynda tur, – dedi A.Qashıev. – Ásirese, qujattardyń sapaly saq­talýyn qamtamasyz etý ma­ńyzdy. Bul maqsatta byltyr arhıv mekemelerinde saq­taý­­ly turǵan 146 myń kóne qujat qalpyna keltirilip, ony qaı­ta túpteý, dezınfeksııalaý jumys­tary júrgizildi.

«Sıfrly Qazaqstan» baǵdar­lamasy aıasynda oblystaǵy 21 mem­lekettik arhıvte, sondaı-aq, oblystyq basqarmalar, qala­lyq jáne aýdandyq ákimdik­ter, olardyń bólimderi men máslı­hattary sııaqty 300-ge jýyq mekemede «Biryńǵaı elektrondy ar­hıv qujattary» dep atalatyn aqparattyq júıe engizilgen.

Búgingi tańdaǵy basty mindet – arhıv qujattarynyń sıfrly kóshirmesin jasaýdy jedeldetý. Bul qujattardyń saqtalý sapasyn arttyryp, izdegen adamnyń tez tabýyna jol ashpaq. 

Búginge deıin memlekettik saq­­taý­ǵa alynǵan 10 myńnan as­tam fotosýret, qaǵaz túrinde saq­taý­ly turǵan 33 myńnyń ús­tindegi qujat skanerden ótkizildi. 2020 jyldyń naýryz aıynan bas­tap oblystaǵy 523 mekemede 59 myńǵa jýyq qujat elektrondy túr­ge kóshirildi, – dedi basqarma basshysy.

Memlekettik qyzmet kórsetý sapasyn arttyrý búgingi tań­da barlyq memlekettik or­gandardyń aldynda turǵan mańyzdy min­dettiń biri ekeni daýsyz. Búginde memlekettik qyzmet túrleriniń basym bóligin oblys turǵyndary elek­trondy túrde alyp otyr. Shek­teý sharalary shıryqqaly elektrondy qyzmetke degen su­ranys ta artty.

Oblystyq arhıv turǵyndarǵa olardyń jumys ótilin, qandaı da bir bilim mekemesinde oqy­ǵanyn, marapattalǵanyn, al­ǵan eń­beka­qy­­synyń mólsherin, mura­ger­­lik­ke quqyly ekenin ras­taı­tyn arhıv anyqtamalary men ar­­hıv qujattarynyń kóshir­me­lerin berý sııaqty mem­le­kettik qyz­met túrlerin kór­se­tedi. Avtomat­tandyrý jáne oń­taı­lan­dyrý shara­larynyń nátı­jesinde atal­ǵan qyzmet túrlerin tur­­ǵyndar Mem­le­kettik korpora­sııa men «elek­trondy portal» arqyly alý­ǵa qol jetkizip otyr. Máselen, ob­lys­taǵy arhıv mekemeleri byltyr 35 myń mem­lekettik qyzmet kór­setse, onyń 71%-y elektrondy túrde júzege asy­ryl­ǵan. 2019 jy­ly bul kór­setkish­tiń nebári 7 paıyz­ bol­ǵa­nyn aıta ketken jón.

Oblysta sońǵy 17 jyldyń ishin­de túrli salalar men taqy­ryp­­tar qamtylǵan 67 tarıhı-derek­­temelik qujattar jınaǵy ja­ryq kórgen. Bul jınaqtar ob­lys aýmaǵyndaǵy mekemeler men ká­sip­oryndardyń tarı­hyn, son­daı-aq Tobyl topyraǵynda týyp-ós­ken nemese osy óńirde qyz­met et­ken qaı­rat­ker tulǵa­lar­dyń ómiri men eńbek tarıhyn zert­teýshiler úshin tap­t­yrmas de­rek kózi bolyp sana­lady.

Qostanaı oblysy