Aqparat jáne qoǵamdyq damý mınıstri Aıda Balaevanyń tóraǵalyǵymen Aqparatqa qol jetkizý máseleleri jónindegi komıssııanyń otyrysy ótti, dep habarlaıdy Egemen.kz
Onlaın formattaǵy jıynǵa memlekettik jáne jergilikti atqarýshy organdar men úkimettik emes jáne basqa da uıymdardyń ókilderi qatysty. Ondaǵy maqsat aqparatqa qol jetkizý salasyndaǵy zańnamanyń novellalaryn tanystyryp, keńinen túsindirý.
Esterińizge sala keteıik, 2020 jyldyń 30 jeltoqsanynda Memleket basshysy «Qazaqstan Respýblıkasynyń keıbir zańnamalyq aktilerine aqparat máseleleri boıynsha ózgerister men tolyqtyrýlar engizý týraly» zańyna qol qoıǵan edi. Onda «Aqparatqa qol jetkizý týraly» zańyna birqatar túzetýler engizilgen bolatyn. Mınıstr Aıda Balaeva osyǵan oraı Aqparat jáne qoǵamdyq damý mınıstrligi aqparatqa qol jetkizý salasyndaǵy ýákiletti organ retinde memlekettik organdardyń zań talaptaryn oryndaýyna monıtorıng júrgizý boıynsha júrgizilip jatqan jumysty kúsheıgenin atap ótti.
Jıyn barysynda Aqparat jáne qoǵamdyq damý vıse-mınıstri baıandama jasady. Bolat Tlepov negizgi bul taqyrypta negizgi eki máselege nazar aýdarý qajettigin atap ótti. Alǵashqysy - árbir memlekettik organda aqparatqa qol jetkizý máseleleri boıynsha ýákiletti tulǵany nemese bólimsheni aıqyndaý bolsa, ekinshisi aqparatqa qol jetkizý salasynyń jaı-kúıi týraly jyl saıyn Memleket basshysyna esep engizý máselesi.
Osy turǵyda ıınıstrlikpen aýqymdy aqparattyq-túsindirý jumystary júrgizilip, memlekettik organdardyń jaýapty qyzmetkerleri úshin semınarlar uıymdastyrylatyny týraly aıtyldy.
Onlaın jıynda máslıhattar qyzmetiniń ashyqtyǵy máselesi de qalys qalmady. Aqparat jáne qoǵamdyq damý mınıstrligi oblystardyń, Nur-Sultan, Almaty jáne Shymkent qalalary máslıhattarynyń saıttaryna taldaý jasady. Saraptaý nátıjesi saıtpen jumys isteýdegi kemshilikterdiń az emes ekenin kórsetti. Máselen Atyraý oblysynyń máslıhatynda jeke ınternet-resýrsy joq bolsa, Aqtóbe, Jambyl, Batys Qazaqstan jáne Qostanaı oblystarynyń máslıhattary saıtta aqparatty ýaqytyly jańartpaıtyny belgili boldy. Sondaı-aq 9 máslıhatta onlaın-translıasııa jazbalary ornalastyrylmaǵan.
Oblystardaǵy osyndaı kemshilikterge qatysty ǵalamtor aqparat alýdyń negizgi kózine aınalǵanyn eskerip, memlekettik organdardyń saıttaryndaǵy aqparatty ýaqtyly jańartý óte mańyzdy ekeni sóz boldy.
Bul máselege qatysty Ulttyq ekonomıka mınıstrliginiń ókili Anar Baıtýkenova da ún qosty. Barlyq deńgeıdegi máslıhat otyrystaryn mindetti onlaın-translıasııalaýdy engizý boıynsha júrgizilip jatqan jumystar týraly baıandaǵan ol 2022 jyldyń qańtaryna qaraı otyrystardyń onlaın-translıasııasyn barlyq máslıhattarda engiziletinin atap ótti.
Aıta keteıik, bul jumys Prezıdent Joldaýyn iske asyrý jónindegi Jalpyulttyq is-sharalar josparynyń 142-tarmaǵy sheńberinde júrgizilýde.
Otyrys qorytyndysy boıynsha Komıssııa memlekettik organdarǵa «Aqparatqa qol jetkizý týraly» Zańǵa engizilgen ózgeristerdi iske asyrýǵa, sondaı-aq máslıhattar qyzmetiniń ashyqtyǵyn arttyrýǵa baǵyttalǵan birqatar usynymdar ázirlendi.