Qazaqstanǵa ekstrakorporaldy uryqtandyrý (EKO) prosedýrasy úshin zeınetaqy jınaǵyn qoldanýǵa ruqsat beriledi. Bul týraly «Otbasy bankiniń» basqarma tóraǵasy Lázzat Ibragımova aıtty, dep habarlaıdy Egemen.kz
«Endi zeınetaqy jınaǵyn alýǵa qatysty erejede segizinshi maqsat qosyldy, ol «kómekshi reprodýktıvti ádister men tehnologııalar» dep atalady. Munyń ishine ekstrakorporaldi uryqtandyrý prosedýrasy da kiredi», deıdi Lázzat Ibragımova áleýmettik jeli arqyly ótken tikeleı efır barysynda.
Onyń aıtýynsha, zeınetaqy jınaǵyn qoldaný erejelerin Densaýlyq saqtaý mınıstrligi kelesi aptada jarııalaıdy.
«Kelesi aptada bul erejeler zańdy kúshine enedi dep kútip otyrmyz. sábıli bolýǵa qatysty máseleleri bar otbasylar zeınetaqy jınaǵy esebinen EKO jasaý múmkindigine ıe bolady», deıdi ol.
Eske salsaq, QR Prezıdenti Qasym-Jomart Toqaev Qazaqstan halqyna Joldaýynda 2021 jyldan elimizde «Ańsaǵan sábı» arnaýly baǵdarlamasy iske qosylatynyn aıtty. 2021 jyly 2 qańtarda QR Prezıdenti Qasym-Jomart Toqaev zeınetaqy jınaǵynyń bir bóligin maqsatty paıdalanýǵa qatysty zańǵa qol qoıdy. Qazaqstandyqtardyń zeınetaqy jınaqtaryn paıdalaný úshin jańartylǵan «jetkiliktilik shegi» jarııalandy.
Zeınetaqy jınaǵynan alýǵa bolatyn soma BJZQ saıtynda avtomatty túrde kórsetiledi. 23 qańtardan Qazaqstanda zeınetaqynyń bir bóligin alýǵa ótinim qabyldaý bastaldy. Arnaıy portalda zeınetaqynyń bir bóligin alýǵa ótinim qabyldaý bastalǵaly úsh saǵattyń ishinde 4 myńnan astam adam ótinish berdi. Zeınetaqy qarjysyn emdelý úshin alý erejeleri osy aıdyń sońynda jarııalanady.