Avtoónerkásip salasynyń jumyskeri degendi estigen jannyń kóz aldyna eń aldymen er adamnyń sulbasy kólbeńdep tura qalatyny ras. Alaıda Qostanaıdaǵy mashına jasaý zaýytynda otandyq avtokólik qurastyrýǵa úlken úles qosyp júrgen arýlar az emes.
Raýshan Baıbatjanova jeti jyldan beri Qostanaıdaǵy «Saryarqaavtoprom» seriktestiginde avtokólik shanaǵyn syrlaýshy, árleýshi bolyp jumys istep keledi. Raýshannyń kúndelikti mindeti – syrlaý sehynan jańa shyqqan kólikterdiń syrtqy qabatyn tegistep, aınadaı etip jyltyratý.
– Kópshiligi árleý jumystary kólik shanaǵynyń syrtyn jyltyratyp, boıaýyn ashý úshin ǵana jasalady dep túsinedi. Negizinde, shanaqqa juqqan syr men lak qabatynda jaı kózge kórine qoımaıtyn kedir-budyr kóp bolady. Men osylardy ábden tegistep, avtokólik shanaǵyn uzaqqa deıin syry ketpeıtindeı etip jyltyratyp shyǵaramyn, – dedi shanaq árleýshi.
Raýshan «Saryarqaavtoprom» seriktestigine alǵash kelgen jyly syrlaý sehynda úsh-tórt-aq qyz-kelinshek bar edi. Kásiporyn basshylyǵy otandyq kólikterdi syrlap, árleý barysynda erlerden góri áıelderge kóbirek senim artatyn bolsa kerek, qazir olardyń sany jıyrmaǵa jeti. Munda nebary bes-aq er adam jumys isteıdi. Seh brıgadasy bir aýysymda 18 kólik shanaǵyn árlep shyǵarady.
– Eńbekaqymyz jaman emes, zaýytta tegin tamaqtanamyz. Munyń syrtynda, jumysqa qyzmettik avtobýspen kelemiz. Úıge de osy avtobýspen qaıtamyz. Syrlaý sehyndaǵy jumysymyz da qyzyq. Ádette jaı adamǵa jańa syrlanǵan avtokóliktiń syrty minsiz ári tep-tegis bolyp kórinýi múmkin. Al men syrt adamdar baıqaı bermeıtin názik kemshilikterdi kórip qoıa beremin. Shanaqtyń syrtqy tegistigin saýsaqpen sezine bilý kerek. Avtokólik te áıel sııaqty, ekeýi de sulýlyqpen úılesip turady, – dedi Raýshan.
О́z kásibiniń has sheberi ári aıaýly ana Raýshan Baıbatjanova taıaýda Qostanaı oblysynyń isker áıelder qaýymdastyǵy uıymdastyrǵan baıqaýdyń jeńimpazy atandy.
Qostanaı oblysy