Shymkent qalasynyń ákimi Murat Áıtenov qaladaǵy birqatar densaýlyq saqtaý mekemesin aralap, áleýmettik salanyń qazirgi jaǵdaıymen tanysty. Qala ákimi aldymen densaýlyq saqtaý basqarmasynyń «№ 6 qalalyq emhana» MKK-de boldy, dep habarlaıdy Egemen.kz
Aýysymyna 500 kelýshini qabyldaıtyn emhana halyqqa qoljetimdi, sapaly jáne qaýipsiz qyzmettermen ambýlatorııalyq jáne stasıonarlyq kómek kórsetýde. Emhanaǵa tirkelgen turǵyndar sany – 72 173.
Búgingi tańda emhana 100 paıyz aqparattyq júıege qosylyp, barlyq baǵyttaǵy qyzmet elektrondy túrde kórsetilip jatyr. Turǵyndar dárigerge jazylý, dárigerdi úıge shaqyrtý, zerthanalyq taldaýlar qorytyndysyn alý, dári-dármek reseptisi jáne t.b. qyzmettterdi jańa júıemen alady. Iаǵnı munda elimizde alǵashqy bolyp júkti áıelderdiń monıtorıngi avtomattandyrý júıesine kóshti.
Bas dáriger A.Qylyshbaeva aýrýdyń aldyn alý, pasıentterdiń densaýlyqtaryn baqylaýda ustaý jáne olarǵa taldaý jasaý maqsatynda ashylǵan sıtýasııalyq ortalyqtyń jumysyn túsindirip berdi.
– Aqparattyq júıe arqyly bizde tirkeýde turǵan árbir pasıenttiń densaýlyq jaǵdaıyn qadaǵalaýǵa múmkindik bar. Máselen, bosanǵan ananyń perzenthanadan shyqqan kúni, ana men balanyń densaýlyq jaǵdaıy sekildi aqparattardy ýaqytynda bilip otyramyz. Oǵan taldaý jasalady. Ary qaraı mamandarymyz ana men balanyń densaýlyǵyn óz baqylaýyna alady. Onlaın rejimde barlyq sıtýasııalyq jaǵdaılardy nazarda ustaımyz, – deıdi bas dáriger.
Sondaı-aq mekemede emdeý-deneshynyqtyrý kabıneti, balalarǵa arnalǵan arnaıy alańqaı, medısınalyq kómektiń kepildendirilgen kólemi sheńberinde tegin jáne jeńildetilgen dári-dármektermen qamtamasyz etetin dárihana jumys istep jatyr.
Emhana búginde barlyq qajetti materıaldyq-tehnıkalyq jabdyqtarmen jabdyqtalǵan. Jyl basyndaǵy jaǵdaı boıynsha mekemeniń jabdyqtaý kórsetkishi – 79,08%. Medısınalyq tehnıkanyń tozýy – 61%, negizgi quraldardyń tozýy – 39,40%, medısınalyq tehnıkany paıdalaný tıimdiligi – 86,12% jáne kompıýterlermen jabdyqtalýy 70,15%-y quraıdy.