Qostanaı oblysynda jyl aıaǵyna deıin erikti túrde 90 myń adamǵa Covid-ke qarsy vaksına salý josparlanyp otyr, dep habarlaıdy Egemen.kz.
О́ńirde eń birinshi kezekte medısına qyzmetkerleri vaksına alyp jatyr. Búginge deıin 365 dárigerge Reseıdiń «Spýtnık V» vaksınasy egildi. Reseıden ákelingen 1200 vaksına taýsylǵan soń, «Qaraǵandy farmasevtik kesheni» shyǵarǵan «Gam-KOVID-Vak» pen BǴM Bıologııalyq qaýipsizdik máseleleri ǵylymı ınstıtýtynyń «QazCovid» vaksınasy paıdalanylatyn bolady.
Bul týraly óńirlik kommýnıkasııa ortalyǵynda ótken baspasóz jıynynda oblystyń bas sanıtarlyq dárigeri Ermuhanbet Dáýletbaev málim etti.
«Qazir 18 jasqa tolmaǵan jáne 65 jastan asqan turǵyndarǵa vaksına salynbaıdy. Munyń «Spýtnık V» vaksınasynyń sapasyna esh qatysy joq. Statıstıkalyq málimetterdiń azdyǵynan osyndaı uıǵarymǵa kelip otyrmyz. Statıstıkany taldaýǵa birneshe aı ýaqyt ketedi, tek sodan keıin ǵana balalar men egde tartqan azamattarǵa vaksına egý týraly sheshim qabyldanady», dedi bas sanıtar.
Oblystyq densaýlyq saqtaý basqarmasy basshysynyń m.a. Rústem Aıtbaevtyń sózinshe, aqpan aıynda tek medısına qyzmetkerlerine ekpe jasaýǵa múmkindik bar. О́ıtkeni dárigerler kúndelikti jumysta vırýs tasymaldaýshylarmen kezdesýi múmkin. Sondyqtan olardy meılinshe saqtandyryp, qaýipsiz jaǵdaıda jumys isteýin qamtamasyz etkimiz keledi. Al kontıngentti keńeıtý máselesi mamyr aıynda sheshiledi.
Oblystyń bas sanıtarlyq dárigeri Qytaıdan Pfizer vaksınasyn aldyrtý jóninde kelisim júrip jatqanyn aıtyp qaldy.