Turǵyn úıdi jalǵa alý qunyn anyqtaıtyn álemdik reıtıngte Qazaqstan 138 eldiń ishinen 107-oryn ıelendi. Reıtıng Nıý-Iork ındeksine (100) súıene otyryp, ár eldiń jalǵa alý quny qanshalyqty qymbat nemese arzan ekenin zerdelep kórgen.
Eger el ındeksi 110 bolyp ketse, onda jaldaý quny Nıý-Iorkke qaraǵanda 10 paıyzǵa qymbat, eger ındeksi 95 bolsa, jaldaý quny amerıkalyq megapolıske qaraǵanda 5 paıyzǵa arzan degen sóz. Bul oraıda Qazaqstannyń ındeksi 9,31-di quraıdy.
Jalǵa alý quny eń qymbat elder – Bermýd araldary (92,86), Gonkong (74,24) jáne Sıngapýr (64,77). Reıtıng deregi boıynsha álemdegi eń arzan jaldaý quny Aýǵanstanda tirkelgen.
2020 jyldyń jeltoqsan aıyndaǵy kórsetkish boıynsha Qazaqstandaǵy jaǵdaıy kelisken turǵyn úıdi jaldaý quny sharshy metrine 1,6 myń teńgeni quraǵan. Bul 2019 jylmen salystyrǵanda 9,3 paıyzǵa joǵary. Qarasha aıymen salystyrǵanda baǵa 1,2 paıyzǵa ósipti. О́ńirler boıynsha eń qymbat baǵa Nur-Sultan (2,9 myń teńge), Almaty (2,3 myń teńge), Aqtaý (2 myń teńge) qalalarynda tirkelse, eń arzan baǵa Semeıde – sharshy metrine 1,2 myń teńge.
Krisha.kz deregi boıynsha Almaty qalasyndaǵy arenda quny sharshy metrine 2500-2700 teńge aralyǵynda ózgerip otyrady. Arnaıy monıtorıngte aýmaǵy 36-dan 90 sharshy metrge deıingi páterler qarastyrylǵan. Ornalasqan aýdanyna baılanysty bir bólmeli páter arendasynyń ortasha quny 76 myń – 140 myń teńge aralyǵynda bolsa, eki bólmeli páterdi jaldaý úshin 105 myń – 195 myń teńge aralyǵynda qarajatyń bolýy shart. Al úsh bólmeli úıler 118 myńnan 225 myńǵa deıin sharyqtaıdy. Taldaýshylardyń aıtýynsha, bir jyl ishinde qun 7-10 paıyz aralyǵynda qymbattap otyr. Almatyda eń arzan baspanalar Túrksib, Naýryzbaı aýdandarynda ornalassa, Bostandyq, Almaly, Medeý shahardyń qymbat aýdandary sanalady.
ALMATY