Qyzylorda qalasynyń ákimi Nurlybek Nálibaev shahardaǵy birqatar nysandarda boldy. Aralaýdy aldymen kúrdeli jóndeýden ótken «Qyzylorda sý júıesi» mekemesiniń qazirgi tynysy men jumysyn kórýden bastaǵan qala basshysy jańarǵan ǵımarattyń jańalyqtaryna oń baǵa berdi, dep habarlaıdy Egemen.kz
Mekeme ǵımaraty 1964 jyly boı kótergen. Sodan beri jóndeý kórmegen nysannyń tozyǵy jetip, qyzmetkerlerdiń jumys isteýine aıtarlyqtaı qıyndyq týyndaǵan. Byltyr jarty ǵasyrdan astam tarıhy bar ǵımarattyń jańa keıipke enýine «Jumyspen qamtýdyń Jol kartasy» baǵdarlamasynyń sharapaty tıdi.
Baǵdarlama aıasynda bólingen qarjyǵa sý júıesiniń óndiristik tehnıkalyq bazasy jańǵyrtylyp, ǵımaraty jóndeldi. Mekeme aýlasy asfalttalyp, seh jáne garajy qalypqa keltirildi. Sonymen birge mekemeniń taǵy bir jańalyǵy turǵyndardyń aýyz sý máselesine qatysty saýaldaryn qabyldaýǵa arnalǵan dıspetcherlik bólim qurylǵan. Artyqshylyǵy sý júıesiniń mamandary burynǵydaı úı-úıdi aralap, turǵyndar qaryzyn jınaýmen aınalyspaıdy. Sýǵa qaryzyńyz bolsa qońyraý shalyp ne bolmasa, habarlama jazý arqyly eskertedi. Al turǵyndar qaryzynyń bar joǵyn anyqtaǵysy kelse ortalyqtyń baılanys nomerine habarlasyp, aqparat alýǵa múmkindigi bar.
Aralaý barysynda mekemeniń búgingi ózgerisi men qol jetken jetistiginiń barlyǵy memleket tarapynan kórsetilgen úlken qoldaýdyń nátıjesi degen qala ákimi: «Ǵımarattaryńyz jańardy. Endigi rette turǵyndarǵa úzdiksiz qyzmet kórsetip, sapaly aýyz sýmen qamtý kerek», dedi ol. Sonymen birge qyzmetkerlerdiń aılyǵyn ýaqytyly tólep, úzdik jumysshylarǵa syıaqy berýdi de úılestirý kerektigin de atap ótti. Sondaı-aq turǵyndarmen tildesip, mekemeniń qyzmet kórsetý sapasy jaıynda pikirlesti.
О́z kezeginde mekeme basshysy Marat Jámıev qyzmetkerlerdiń aılyǵy buryn 6-7 aıǵa deıin keshiktirilse qazir bir júıege kelip qalǵandyǵyn aıtyp, saladaǵy jaǵymdy jańalyqtyń biri qaladaǵy aýyzsý tarıfy arzandap, 61 teńgeden 44 teńgege tómendegendigin jetkizdi.