Táýelsizdik jyldaryna deıingi ýaqytta da qazaqstandyq boks, kúres sportynyń sheberleri ózderiniń myqtylyǵyn tek KSRO ishinde ǵana dáleldep qoımaı, álemdik birqatar iri dodada qarsylastaryn qoǵadaı japyryp, tórtkúl dúnıeniń kóz aldynda áıgilegen edi. Mine, sol dástúr kúni búginge deıin jalǵasyn taýyp keledi.
Dese de keı sport túrlerinen jerlesterimizdiń tynysy tek el Táýelsizdiginen keıin, Elbasymyzdyń sportqa degen erekshe qamqorlyǵynyń arqasynda ashyla tústi. Tuńǵysh Prezıdent Nursultan Nazarbaevtyń bastamasymen elimiz 30 jylda sport salasynda tolaıym tabystarǵa jetip qana qoımaı, sport ınfraqurylymdaryn damytýda da alǵa qadam jasady. Osyndaı qoldaýdyń arqasynda jerlesterimiz egemendiktiń 30 jyldyǵynda tyńnan túren salyp, buryn-sońdy jetistikke jetip kórmegen sport túrlerin meńgerip, álemdik arenalarda atoı saldy. Atap aıtar bolsaq, kórkem gımnastıka, sporttyq akrobatıka, sý sport túrleri, velosport jáne birqatar qysqy sport túri bar. Solardyń arasynda eń negizgisi – mánerlep syrǵanaý sporty edi. О́ıtkeni Táýelsizdiktiń aq tańy atqannan keıin sport sańlaqtarymyz túrli jarystarda el qorjynyna júlde sala bastady. Máselen, muzaıdynnyń muzbalaǵy sanalǵan Denıs Ten 2014 jyly Sochıde ótken qysqy Olımpııa oıyndarynda qola medal alyp, jalǵyz júldemen Reseı tórinde mereıimizdi asyrǵany jankúıerler men el esinde máńgilik saqtalatyny anyq. Odan bólek Denıs elimizde ótken qysqy Azııa oıyndary men Ýnıversıadada aldyna jan salǵan joq. Ońtústik Koreıanyń bas shahary – Seýlde jalaýy jelbiregen Tórt qurlyq chempıonatynda atoı saldy. Sondaı-aq London men Shanhaı qalalarynda uıymdastyrylǵan kezekti álem chempıonattarynda bir kúmis, bir qola medal oljalady.
Al áıelder arasynda mánerlep syrǵanaýdan maqtanyshymyz Elızabet Tursynbaeva sporttyń bul túrinen tolaıym tabystarǵa qol jetkizip, qarsylastary qaımyǵatyn áıgili sportshyǵa aınaldy. 2019 jyldyń naýryzynda Saıtamada (Japonııa) ótken mánerlep syrǵanaýdan álem chempıonatynda kúmis medal alyp, negizgi baǵdarlamada 4 aınalym (4S) elementin oryndaǵan álemdegi alǵashqy mánerlep syrǵanaýshy qyz retinde tarıhqa endi. Buǵan deıin mánerlep syrǵanaý tarıhynda 16 jastan asqan áıelder arasynda eshkim tórt aınalym element sekirmegen-di.
Jýyrda dál osy Denıs Ten men Elızabet Tursynbaevanyń izin jalǵaǵan sportshylar el Táýelsizdiginiń 30 jyldyǵyna oraılastyrylǵan mánerlep syrǵanaýdan Qazaqstan kýbogynda baq synady. Elimizdiń eń úzdik degen sportshylarynyń basyn qosqan Almatydaǵy básekede birqatar jańa esimniń jarq etkenine kýá boldyq.
Jarystyń alǵashqy kúninde qyzdar arasyndaǵy básekede qaraǵandylyq Polına Lobınseva jeńiske jetti. Kúmis jáne qola júldeni tıisinshe almatylyqtar Anastasııa Lobanova men Bogdana Rakısheva ıelendi. Erler arasynda elordalyq sportshy Dıas Jırenbaev top jardy. Kúmis medaldy qaraǵandylyq Dmıtrıı Karpýhın, qolany almatylyq Sımon Geıko enshiledi.
Jasóspirim uldar arasynda almatylyq Artýr Smaǵulovqa teń keler eshkim bolmady. О́zge áriptesterine qaraǵanda saýatty óner kórsetken Artýr Qazaqstan kýbogynyń jeńimpazy atandy. Ekinshi jáne úshinshi oryndy shymkenttik Oleg Melnıkov pen qaraǵandylyq Nıkıta Krıvosheev qanjyǵasyna baılady. Jasóspirim qyzdar arasynda shymkenttik Karına Issakova qarsylastaryn shań qaptyryp, altyn júlde oljalady. Bul básekedegi kúmis medaldy Shymkent qalasynyń taǵy bir ókili Aıǵana Sansyzbaeva, qolany elordalyq Mılena Semkova jeńip aldy.
Ekinshi kúngi básekede erler arasynda 16 jastaǵy almatylyq Mıhaıl Shaıdorov dara shyqty. Búginde ol áıgili Olımpıada chempıony Alekseı Ýrmanovtyń qolastynda jattyǵyp, sporttyń qyr-syryn jetik meńgerýde. 2019 jyly Almatydaǵy el chempıonatynda top jarsa, mine, araǵa eki jyl salyp el kýbogynda baǵy jandy.
Bul saıysta ekinshi oryndy Nur-Sultan qalasynyń ókili Dıas Jırenbaev qanaǵat tutsa, úzdik úshtikti Dmıtrıı Karpýhın túıindedi. Al áıelder arasyndaǵy saıysta úsh medal jıyntyǵyn almatylyq qyzdar ózara bólisip aldy. Altyn medaldy Marııa Grechanaıa jeńip alsa, Ajar Jumahanova – kúmis, Anastasııa Lobanova qola medaldy enshiledi.
El kýbogy jolyndaǵy jarys máresine jetken soń Qazaqstan quramasynyń bas bapkeri Quralaı Ýzýrova óz oıyn ortaǵa salyp, aldaǵy josparlaryn aıtty. «Byltyr pandemııaǵa baılanysty halyqaralyq jarystarǵa qatysý bylaı tursyn, jattyǵý jumysyn jasaı almaı qaldyq. Biraq sportshylar soǵan qaramastan, úı jaǵdaıynda jattyǵyp, barynsha sporttyq babyn saqtaýǵa tyrysty. Sóıtip tek tamyz aıynyń sońynda ǵana muz aıdynǵa oralýǵa múmkindik aldyq. Qazirgi tańda sportshylar sporttyq babyna enip úlgerdi, kúndelikti eki rettik jattyǵýlar óz jemisin berip jatyr», dedi ol.
Sonymen qatar Ýzýrova aldaǵy ýaqytta halyqaralyq jarystarda Qazaqstan namysyn qorǵaıtyn sportshylardyń esimin atady. «Erler arasyndaǵy halyqaralyq jarystarda el namysyn jýyrda ǵana Qazaqstan kýbogynda, el chempıonatynda joǵary nátıje kórsetken Mıhaıl Shaıdorov qorǵaıdy. Bul sportshy keıingi eki maýsymda jaqsy nátıje kórsetip, tórt sekirýden turatyn óte kúrdeli baǵdarlamalardy oryndap júr. Áıelder arasyndaǵy jekeleı synda Qazaqstan namysyn Iаsmın Tekık qorǵaıdy. Ol konkımen óte uqypty jumys istep, barlyq jattyǵýdy esh qatesiz oryndaıdy. Sondaı-aq Marııa Grechanaıa jýyrda jasóspirimder arasynda ótetin Bolgarııadaǵy Sophia Trophy jarysynda óner kórsetedi», deıdi bas bapker.