Qostanaıda óńirlik jeke sot oryndaýshylar palatasynyń bastamasymen «Otbasy help» front-keńsesi jumys isteı bastady. Ortalyqtyń maqsaty – erli-zaıyptylardy tatýlastyrý, jas otbasylarǵa psıhologııalyq kómek kórsetý jáne otbasy qundylyqtaryn jandandyrý.
Qazir otbasy máselelerin retteýdiń balamaly ádisterine basymdyq berilip otyrǵandyqtan, sot oryndarynyń ókilderi otbasylyq terapııa aıasynda jumys isteıtin mundaı ortalyqtardyń ár shańyraqtaǵy tatýlyqtyń saqtalyp qalýyna tıgizetin yqpaly mol dep biledi.
Qostanaı qalalyq sotynyń tóraǵasy Qanat Shaqarovtyń aıtýynsha, sońǵy jyldary jergilikti sot organdarynyń jumysynda ajyrasqan otbasylarǵa qatysty sot otyrystary jıilep ketken. Máselen, qalalyq sotqa 2019 jyly neke shartyn buzý týraly – 1400, al 2020 jyly 1100 aryz kelip túsken. Sot tóraǵasy «Otbasy help» front-keńsesiniń iske qosylýy mundaı aryzdardy azaıtady degen senim bildirdi.
– Biz qıyn jaǵdaıǵa dýshar bolǵan otbasylarǵa psıhologııalyq kómek kórsetemiz. Erli-zaıyptylardyń arasyndaǵy ózara súıispenshilik pen syılastyqty qalpyna keltirýge tyrysamyz. Mundaı otbasy músheleri kóbine kúızelis ústinde júredi. Sondyqtan olarǵa psıhoterapevt mamandardyń, dáriger-narkologtardyń, zańgerlerdiń kómegin usynamyz. Jas otbasylarǵa, jas ákelerge, kelinderge arnalǵan túrli trenıngter uıymdastyryp, olardyń jumysqa ornalasýyna da kómektesemiz, – dedi front-ofıs jetekshisi Nesibeli Bıkenova.
«Otbasy help» front-keńsesi ózara áriptestik týraly memorandým aıasynda qazir Qostanaı qalalyq sotymen tize qosyp jumys istep jatyr. Front-keńse jetekshisiniń sózine qaraǵanda, «Otbasy help» keleshekte otbasylyq máselelerge qatysy bar ózge de memlekettik organdarmen jáne qoǵamdyq birlestiktermen yntymaqtastyq ornatpaq.
Qostanaı oblysy