Qostanaı oblysynyń medısına qyzmetkerlerine covid-19 vırýsyna qarsy ekinshi ret vaksına egý bastaldy.
Buǵan deıin óńirdegi emdeý mekemeleriniń, jedel medısınalyq kómek qyzmetkerleri men jansaqtaý, qarqyndy terapııa bólimsheleriniń, sondaı-aq sanepıdqyzmet mamandary vaksına qabyldaǵan bolatyn.
- Indetke qarsy vaksına eki márte salynýy tıis. Aqpan aıynyń basynda oblystyń 1200 medısına qyzmetkeri birinshi vaksınany aldy. Endi olar araǵa 21 kún salyp, ekinshi ret ekpe qabyldap jatyr, - dedi densaýlyq saqtaý basqarmasynyń baspasóz hatshysy Ksenııa Jylqybaeva.
О́ńirde COVID-19-ǵa qarsy ekpe jumystary kezeń-kezeńimen júzege asyrylady. Medısına qyzmetkerlerinen keıin kezek vırýs juqtyrý qaýpi joǵary sanatqa jatatyn muǵalimderge keledi. Odan keıin jappaı tegin ekpe bastalady. Bul kezeńde ekpeni árkim óz qalaýy boıynsha qabyldaı alady.
Oblystyq densaýlyq saqtaý basqarmasy ókilderiniń aıtýynsha, aldaǵy aptada Qostanaıǵa 4500 vaksına qutysy keledi. Ony basqarmanyń jaýapty bólimi qabyldap alyp, arnaıy tońazytqyshtarǵa salyp oblys emhanalaryna jóneltedi.
Koronovırýsqa qarsy kúres jónindegi shtab málimetinshe, 20 aqpanda óńirde COVID-19-dyń 69 jaǵdaıy tirkelgen. Indet juqtyrǵandardyń kóbi – oblys ortalyǵynyń turǵyndary. Odan keıingi orynda Rýdnyı, Jitiqara, Lısakov qalalary tur. Altynsarın, Denısov aýdandarynda da indet juqtyrǵan bir-ekili naýqas tirkelgen. Jalpy, aımaqta byltyrǵy 3-sáýirden beri 11851 adam indet juqtyryp, 10325 naýqas emdelip shyqqan.