Birde jyly, birde sýyq qubylmaly aqpannyń basy bıyl jaıly bastalǵanymen, tabıǵat tosynnan dúleı minez tanytyp, bir kúnniń ishinde aınalany alaı-túleı qylyp ketti.
Qostanaı oblysynda 18 aqpan kúni kárine mingen aqtútek boran dala túgil, qalanyń ishinde taıaq tastam jerdi kórsetpeı tastady. Sol kúni kúsheıtilgen qyzmet tártibine kóshken qutqarýshylar men polısııa qyzmeti dereý oblys joldaryn jaýyp, kólik qozǵalysyna shekteý qoıdy. Biraq dúleı boran kópke sozylmady. Kelesi kúni aspan shaıdaı ashylyp, aýa raıy túk bolmaǵandaı keıip tanytqanymen, jurt aýzyndaǵy keshegi borannyń áńgimesi áli basylǵan joq. Biri aýlasyna taý bolyp úıilgen qardy aıtsa, endi biri áleýmettik jelige tarap ketken Qostanaıǵa kireberiste aqtútek borannyń astynda kóliktiń aldyna túsip alyp, alasuryp júgirip júrgen sary shekpendi polıseı týraly vıdeony aıtady.
Bul polıseıdiń kim ekeni keıin anyqtaldy. Ol byltyr sáýir aıynda órtenip jatqan eki qabatty úıdiń ishinen 15 adamdy aman-esen alyp shyqqan qalalyq patrýl qyzmetiniń ınspektory Amantaı Baıjanov bolyp shyqty. Qyzyl jalynǵa oranǵan úıdiń qorshaýynan sekirip túsken ol esikti teýip syndyryp, tars uıqyda jatqan adamdardy oıatyp, oıana almaǵandaryn dalaǵa kóterip shyǵarǵan. Eń aldymen 5 jasar balany alyp shyqqan. «Tilsiz jaýmen» arpalysyp júrgende ústindegi kıimi janyp, qolyn ot qaryp, ıyǵyna deıin kúıdirip alǵan. Ony eleń qylmaǵan polıseı ertesi kúni kúndelikti qyzmetine kirisip ketken.
Endi, mine, aqpannyń aq boranynda dúıim jurtqa el amandyǵy úshin otqa da, sýǵa da túsýge daıar ekenin dáleldegen Amantaıdyń esimi – taǵy da el aýzynda.
– Áriptesim ekeýmiz qala ishinde patrýldik qyzmetimizdi atqaryp júr edik, kezekshiden Fedorov aýdanyna shyǵar tustaǵy jol-kólik oqıǵasy bolǵan jerge jetińder degen nusqaý aldyq. Qalanyń shetinde boran eki ese kúshti. Jol múlde kórinbeıdi, rýlde otyrǵan adamǵa tipti qıyn. Oqıǵa ornyna kelgen soń, qalaǵa tolassyz kirip jatqan kólikter legin bastap kele jatqan birneshe avtokóliktiń jol shetine shyǵyp, qarǵa batyp qalǵanyn kórdik. Olar keıingilerge kedergi jasap, kólik keptelisi paıda boldy. Sol jerdegi júrgizýshilerdiń kómegimen álgi kólikterdi qolmen ıterip shyǵaryp, jol qozǵalysyn retke keltirdik. Odan keıin aqtútek boranǵa qaramastan, qala syrtyna shyǵyp bara jatqan birneshe jeńil kólikti toqtatyp, keıin qaıtardyq. Áleýmettik jelige tarap ketken vıdeony sol júrgizýshilerdiń biri túsirip alǵan shyǵar. Sol kúni ár kóliktiń aldyna túsip, jaıaý júgirip júrip jol kórsetýge týra keldi. О́ıtkeni jol qardyń astynda qaldy, qaıda qarasań da dala sııaqty. Kólik jol shetine shyǵyp ketse, ony shyǵarý qıyn. Mundaı boranda kóp oılanyp turýǵa ýaqyt bolmaıdy ǵoı. Arttaǵy kólikke qaraılap, aqyryn ǵana júgirdim, – dedi polısııa ınspektory.
Amantaı aqtútek boranda kólikterdi qaýipsiz jerge deıin shyǵaryp salý úshin árli-berli kúrtik qar keship, jaıaý júgirýmen bolǵan.
Qostanaı qar qursaýynda qalǵan 18 aqpan kúni TJD qut-qarýshylary da kúsheıtilgen jumys tártibine kóshti. Departamenttiń eki «KamAZ 4318» arnaıy tehnıkasy saǵat 18:00-den 23:00-ge deıin qala kóshelerin aralap, aıaldamalarda avtobýs kútip tońyp qalǵan 673 adamdy úılerine jetkizip tastady.
Qostanaı oblysy