Senat depýtaty Dana Nurjigit otandyq televızııadaǵy keıbir baǵdarlamalar ulttyq ustanymdarymyzǵa qaıshy dep esepteıdi. Bul týraly parlament ókili úkimet basshysyna joldaǵan saýalynda aıtty, dep habarlaıdy Egemen.kz.
Depýtattyń aıtýynsha, búgingi televızııalyq kontenttiń kórermen eń kóp qaraıtyn ýaqyty – praım taımda (18:00 – 24:00) ulttyq sanaǵa soqqy bolatyn, halyqtyń ar namysyna tıetin taqyryptarǵa arnalyp otyr. Depýtat reıtıng kóterýge baǵyttalǵan sensasııalyq taqyryptarǵa arnalǵan tok-shoýlar ıdeologııany nasıhattaý úshin jumsys istemeıdi degen pikirde.
«Qazaqstannyń aqparat salasyndaǵy zańnamasynda telearnalardyń basty qaǵıdaty bolýǵa tıisti «ulttyq qundylyqtardy saqtaý», «dáripteý», «nasıhattaý» degen uǵym-túsinik joq. Biz otandyq arnalardyń barlyq ıelerinen efırde kórsetiletin kez-kelgen kontenttiń ulttyq qundylyqtar qaǵıdasyna negizdelýin talap etpeıinshe qoǵamdaǵy rýhanııat deńgeıi kóterilmeıdi. Halyqaralyq tájirıbeni zerdeleı otyryp, Qazaqstan Respýblıkasynyń Úkimetinen zańnamada joǵaryda atalǵan talapty kózdeıtin normalardy qarastyrýdy jáne tıisti zańnamalyq aktilerge qajetti ózgerister men tolyqtyrýlar engizý máselesin qarastyrýdy suraımyn», deıdi senator.