Rýdnyı qalasyndaǵy №2 mektep-gımnazııanyń ónerpazdar ujymy Alǵys kúniniń gımnin jazyp shyqty. Kóktemniń alǵashqy kúni oblystyq assambleıada oryndalatyn Alǵys gımni osydan bir aı buryn jarııalanǵan «Alǵys áýeni» baıqaýyn qorytyndylaý barysynda anyqtaldy.
Baıqaýǵa oblystyń ár óńirinen 20-dan astam mýzykalyq týyndy kelip túsken. Alǵys aıtý kúnine arnalǵan eń úzdik shyǵarmalardyń avtorlary «Dostyq úıinde» ótken saltanatty jıynda marapattaldy.
- Baıqaý jeńimpazdaryn anyqtaý ońaı bolǵan joq. Ozyq turǵan birneshe týyndynyń qaısysyn tańdap alamyz dep kóp oılandyq. Aqyry Rýdnyı qalasyndaǵy № 2 gımnazııanyń ustazdary men oqýshylary shyǵarǵan patrıottyq ándi tańdap aldyq. Baıqaýdyń bas júldesin ardager ustaz Natalıa Býnkovskaıanyń «Qazaqstanym meniń» óleńine jazylǵan Valerıı Obrých pen Elena Arınovıchtiń áni jeńip aldy. Ony joǵarǵy synyp oqýshylary Polına Kasymskaıa men Elızaveta Malseva naqyshyna keltirip tamasha oryndap shyqty, - dedi qazylar alqasynyń tóraǵasy, Qazaqstan Respýblıkasynyń eńbek sińirgen mádenıet qyzmetkeri Svetlana Obýhova.
- Biz shyǵarmashylyq top bolyp birge izdenip, bir jarym aptanyń ishinde jazyp shyqtyq. Qazylar alqasy ánimizdi Alǵys aıtý kúni merekesiniń gımni dep joǵary baǵa berdi. Búginde bul án mektebimizde jıi aıtylyp aıtylyp júr. О́ıtkeni mátini tez jattalyp qalady, áýeni de jaǵymdy, jeńil, aıtýǵa ońaı. Uly aqyn Abaıdyń sózimen aıtar bolsaq, «tilge jeńil, júrekke jyly tıetin» týyndy shyǵardyq, eńbegimizdiń eleýsiz qalmaǵany qýantady, - deıdi týyndy avtorlarynyń biri Elena Arınovıch.
Dostyq úıinde, sonymen qatar, oqýshylar arasynda ótken «Alǵys aıtý kúnine arnalǵan úzdik logotıp» baıqaýynyń jeńimpazdary da anyqtaldy. Bql baıqaýǵa bir aı ishinde 100-den astam avtordyń qolynan shyqqan logotıp úlgileri qabyldanypty. Qazylar alqasynyń sheshimimen, Alǵys aıtý kúnine arnalǵan úzdik logotıp avtory ataǵyna Qarabalyq kentiniń oqýshysy Rostıslav Fomenko laıyq dep tanyldy. Ekinshi oryn Amangeldi aýdanynyń oqýshysy Injý Maqsutova men Áýlıekól aýdanynan kelgen Álibek Ismaǵambetov, Jansaıa Mákenovalarǵa buıyrdy. Al Rýdnyı qalasynda oqıtyn Iýrıı Rybakov, Qostanaı aýdanynyń oqýshysy Chemdýj Anastasııa jáne Áýlıekól aýdanynyń órenderi Bekeeva Gúlnaz, Demıanchýk Estel, Iаsýnskaıte Alına úshinshi oryndy ózara bólisip aldy.
Baıqaý jeńimpazdaryna arnaıy dıplomdar men baǵaly syılyqtar berildi. Sondaı-aq, baıqaýǵa qatysqandardyń bárine oblystyq Assambleıanyń atynan dıplomdar men eskertkish syılyqtar tabys etildi.
Saltanatty jıynnyń sońynda Dostyq úıine jınalǵan qaýym men sharaǵa onlaın rejimde qatysyp otyrǵan qalyń kópshilik qosylyp «Alǵys áýeni» gımnin áýeletti.
Qostanaı oblysy