QR Densaýlyq saqtaý mınıstrligi 2022 jyldan bastap densaýlyq saqtaý uıymdaryndaǵy medısınalyq emes qyzmetkerlerdiń jalaqysyn kóterý máselesin pysyqtaýda, dedi búgin Densaýlyq saqtaý mınıstri Alekseı Soı QR Premer-Mınıstriniń orynbasary Eraly Toǵjanovtyń qatysýymen ótken vedomstvonyń 2020 jylǵy qyzmetiniń qorytyndysy jáne 2021 jylǵa arnalǵan mindetteri boıynsha keńeıtilgen alqa otyrysynda.
«Osylaısha, 2021 jyly dárigerlerdiń ortasha jalaqysy shamamen 320 myń teńge bolady. 2023 jyly 561 myń teńgege deıin jetedi. 2021 jyly orta medısına qyzmetkerleriniń ortasha jalaqysy 173 myń teńge, 2023 jyly 210 myń teńgege jetedi», - dedi A.Soı.
Densaýlyq saqtaý mınıstri Memleket basshysy bıyldan bastap dárigerlerdiń jalaqysyn kezeń-kezeńimen kóterý mindetin qoıǵanyn eske saldy.
2023 jylǵa qaraı dárigerlerdiń jalaqysy ekonomıkadaǵy ortasha jalaqydan eki jarym ese joǵary deńgeıge jetedi dep boljanýda. Máselen, 247 myń medısına qyzmetkeriniń jalaqysyn kóterýge respýblıkalyq bıýdjette tıisti shyǵystar kózdelgen. 2021 jyly – 222 mlrd.teńge, 2022 jyly – 362 mlrd. teńge, 2023 jyly-557 mlrd. teńge.
Sonymen qatar, 2020 jyldyń ózinde dárigerlerdiń ortasha jalaqysy 30%, orta medısına qyzmetkerleriniń jalaqysy 20% ósti.
Densaýlyq saqtaý mınıstri medısına qyzmetkerlerin áleýmettik qoldaý boıynsha Úkimet qabyldap jatqan sharalar týraly aıtty. A.Soı bul aspekt el basshylyǵynyń erekshe baqylaýynda ekenin atap ótti.
«Pandemııada medısına qyzmetkerleriniń jumysy áleýmettik turǵyda óte mańyzdy ekeni belgili boldy, oǵan naqty adamdardyń ómiri ǵana emes, jalpy ekonomıkanyń turaqtylyǵy da táýeldi», - dedi A.Soı.
Esterińizge sala keteıik, koronavırýs ınfeksııasy pandemııasy kezinde epıdemııaǵa qarsy is-sharalarǵa tartylǵan medısına qyzmetkerlerine QR Úkimetiniń sheshimimen materıaldyq qoldaý kórsetildi. 3 táýekel tobyna 116 mlrd teńge kóleminde ústemaqy tólendi.
Ústemaqymen qatar, Memleket basshysynyń sheshimi arqasynda 9 myńnan astam naýqas medısınalyq kómek úshin áleýmettik tólem aldy.