Bıyl Qostanaı oblysynda jas otbasylarǵa qaıtarymsyz baspana sertıfıkattary berile bastaıdy. Bir sertıfıkattyń quny – 3 mln teńge.
– О́ńirde jastardy qoldaýdyń 2021-2025 jyldarǵa arnalǵan keshendi jospary júzege asyryla bastady. Josparǵa engizilgen kóp mindettiń biri – jas otbasylardy baspanamen qamtý tetikterin ońtaılandyrý, – dedi oblystyq jastar saıasaty basqarmasy basshysynyń mindetin atqarýshy Saıat Shaımurynov.
Atalǵan basqarma «Jastar úshin qoljetimdi baspana» baǵdarlamasyn ázirlep te qoıypty. Bul baǵdarlama boıynsha jastar men jas otbasylarǵa baspana satyp alý úshin kómek retinde mólsheri 3 mln teńgege deıin turǵyn úı sertıfıkattary berilmek. Qarjy túrindegi áleýmettik kómek jas otbasylardyń «Otbasy banktegi» depozıtterine bastapqy jarna retinde salynady. Búginde Qostanaı oblysynda 6 462 jas turǵyn úı kezeginde tur. Olar baspana sertıfıkatyna jas erli-zaıyptylardyń neshe jyl birge turyp jatqanyn, balalarynyń sanyn anyqtaý arqyly baǵalanatyn konkýrs arqyly ǵana qol jetkize alady. Bul konkýrstyń qalaı ótetini qazirshe belgisiz. Jastar saıasaty basqarmasynyń basshysy baǵdarlamany iske qosý úshin zańnamalyq aktilerge birqatar ózgeris engizý kerektigin aıtty. Qazir basqarma osy baǵytta jumys istep jatyr.
– Túzetýler engizile salysymen, biz birden jastardyń ótinishin qabyldaýdy bastaımyz, – dedi S.Shaımurynov.
Qostanaı oblysy