Qostanaı óńirinde ótken aptada bolǵan borannyń «jyry» áli taýsylar emes. Tabıǵattyń dúleı minezi adam túgili – jany siri jabaıy janýarlarǵa da ońaı tımepti.
Denısov aýdanynyń 19 jastaǵy turǵyny Abylaıhan Qýandyq jol shetinde ábden álsirep, teńselip qulaýǵa shaq turǵan elikti qutqaryp qalǵanyn aıtty.
– Biz aýylda óstik. Bala kezimizde aýyl irgesindegi ormanǵa jıi baratynbyz. Sodan ba, janýarlardy jaqsy kóremin. 25 aqpan kúni, janymda inim Nurjan bar, ekeýmiz jeke kóligimmen Nur-Sultan qalasynan oqýdan qaıtyp kele jatqanbyz. Ata-anamyz aýylda turady. Kenet jol shetinde turǵan elikti baıqap qaldyq. Ábden kúshi ketip álsiregenin birden ańǵardyq, bizden kómek surap turǵandaı kórindi. Janýardyń tumsyǵy men kózine aınala qalyń qar qatyp qalypty. Basyn kótere almaı, tumsyǵy jer ıiskep tur. Ne aınalasyn kóre almaıdy, ne tebindep jaıyla almaıdy. Ábden ashyqqan. Kózi men tumsyǵyna qatqan ap-aýyr qardan moınyn kótere almaı qalǵan, – dedi Abylaıhan.
Aǵaıyndy ekeý kólikten túsip, eseńgirep turǵan elikke jaılap jaqyndaı bastaıdy. Ánsheıinde anadaıdan úrkip, atyryla jóneletin júırik janýar qasyna taıap kelgen adamdy sezýden qalǵan, azdap qoryqqanymen, qashýǵa shamasy joq. Abylaıhan artqy sıraqtan shap berip ustaǵanda elik te jyǵylady.
– Men jibermeı ustap turdym. Nurjan aldymen muz bolyp qalǵan qatqaq qardy uryp syndyryp, eliktiń tumsyǵyn arshydy. Aýyrsyndy ma, janýar baqyryp jiberdi. Odan keıin aqyryndap kózin qursap jaýyp qalǵan qatqaqty alyp tastady. Kózi shaıdaı ashylǵan janýar bir silkinip aldy da, beti aýǵan jaqqa shaba jóneldi, – dedi Abylaıhan.
Jolaýshylar janýardy qalaı qutqarǵandaryn vıdeoǵa jazyp alyp, áleýmettik jelige salǵan eken, qaralymy kún sanap kóbeıe túsipti.
Qostanaı oblysy