Energetıka mınıstrligi baspasóz qyzmetiniń málimetinshe, óńirlerge suıytylǵan gaz jetkizý jospary qaıta jasaqtaldy.
Buǵan Atyraý munaı óńdeý zaýytyndaǵy katalıtıkalyq krekıng qondyrǵysynyń isten shyǵýyna baılanysty suıytylǵan munaı gazyn óndirý júzege asyrylmaıtyny sebep bolyp otyr. Atalǵan qondyrǵyny qalpyna keltirý naýryzdyń sońyna deıin jalǵasady.
Energetıka mınıstrligi osyǵan baılanysty naýryz aıyna suıytylǵan munaı gazyn jetkizýdiń túzetilgen josparyn qaıta jasaqtady. Onda atalǵan zaýytqa bekitilgen óńirler basqa zaýyttardyń resýrstaryna qaıta bólindi.
«Atap aıtqanda, Almaty, Qaraǵandy, Soltústik Qazaqstan, Jambyl oblystary men Nur-Sultan, Almaty qalalaryna suıytylǵan gaz jetkizý «PetroQazaqstanOılProdakts» JShS-ne júkteldi. Al, Qostanaı men Mańǵystaý oblystaryna «SNPS-Aqtóbemunaıgaz» AQ jetkizedi. Atyraý oblysyn «Teńizshevroıl» JShS, Batys Qazaqstan oblysyn «Jaıyqmunaı» JShS qamtıtyn bolady. Qazir qaıta túzetilgen josparǵa sáıkes gaz jelisi uıymdary men jetkizýshi zaýyttar arasynda sharttar jasaý júrgizilýde. Osylaısha, óńirlerdiń suıytylǵan munaı gazyna qajettiligi josparly kólemde qamtamasyz etiledi» dep habarlady mınıstrliktiń baspasóz qyzmetinen.