Almatydaǵy Qyzdar ýnıversıteti stýdentteriniń ǵylymı áleýetin damytyp, bilim alýshylardyń tanymdyq jáne shyǵarmashylyq qarym-qabiletin arttyrý maqsatyndaǵy «Smart future» atty bilim saıysy márege jetti, dep habarlaıdy Egemen.kz.
Tarıh jáne shetel tilderi ınstıtýtynyń uıymdastyrýymen ótken olımpıada aǵylshyn tili páni boıynsha júrgizildi.
Onlaın rejimdegi olımpıadanyń ashylý rásiminde ınstıtýt dırektory Jamal Áshirbekova men Praktıkalyq shetel tili kafedrasynyń meńgerýshisi Bakıza Pazılova qatysýshylarǵa sáttilik tilep, saıystyń máni men mańyzy týrasynda áńgimeledi.
Olımpıada eki kezeńnen turdy. Alǵashqy irikteý kezeńinde qatysýshylar leksıka-grammatıkalyq test tapsyrmalarymen, aýdıo mátinmen jáne beıne materıalmen jumys istedi. Alǵashqy kezeńnen 80% nátıje kórsetkender ekinshi kezeńde arnaıy uıashyqtarda jasyrylǵan suraqtarǵa jaýap berip, bilimderi men biliktilikterin jan-jaqty dáleldedi.
Saıys barysynda Qyzdar ýnıversıtetiniń 1-kýrs stýdentteri men №1 Almaty qazaq memlekettik gýmanıtarlyq pedagogıkalyq kolledjiniń bilimgerleri ózara baptary men baqtaryn synasty.
– Olımpıadanyń birinshi kúni stýdentter coreapp.ai platformasynda leksıka-grammatıkalyq test, tyńdalym jáne oqylym daǵdylary boıynsha tapsyrmalardy oryndady. Oǵan 87 stýdent qatysty. Irikteý boıynsha 21 stýdent ekinshi kezeńge joldama aldy, – deıdi olımpıada uıymdastyrýshylary.
Eki kúnge sozylǵan bilim jarysynyń qorytyndysy boıynsha birinshi orynǵa «Mýzyka» mamandyǵynyń stýdenti Mınýara Nıldıbaeva laıyq dep tanyldy. Jeńimpazǵa ýnıversıtettiń «Tilder ortalyǵyna» bir aılyq tegin aǵylshyn tili kýrsyna joldama berildi. Ekinshi oryndy «Orys tilinde oqytpaıtyn mektepterdegi orys tili men ádebıeti» mamandyǵynyń stýdenti Janna Maqsatqyzy men №1 Almaty qazaq memlekettik gýmanıtarlyq pedagogıkalyq kolledjiniń bilimgeri Alsý Týhvatýllına ózara bólisti.
Al úshinshi oryn «Kitaphana isi» mamandyǵynyń stýdenti Kamıl Galımbekova, «Informatıka jáne robototehnıka» mamandyǵynyń stýdenti Aıajan Araılym, «Qazaq tili men ádebıeti» mamandyǵynyń stýdenti Anııa Qalıjanqyzyna buıyrdy. О́zge qatysýshylar «Alǵys hatpen» marapattaldy.