Qazaq ulttyq qyzdar pedagogıkalyq ýnıversıtetiniń Pedagogıka jáne psıhologııa joǵary mektebiniń 4 kýrs stýdentteri Janerke Abdýlla, Aqtoty Bımyrzaeva jáne Aıda Taǵaımurat «Úzdik pedagogıkalyq ónim – 2021» respýblıkalyq baıqaýynda «Úzdik ǵylymı joba» atalymy boıynsha birinshi orynǵa ıe boldy. Bul týraly oqý ornynyń baspasóz qyzmeti habarlady.
Jobanyń ataýy – «Mektep jasyna deıingi balalardyń ólketaný is-áreketinde qundylyq baǵdaryn qalyptastyrý».
Stýdentterdiń ǵylymı jetekshisi – pedagogıka ǵylymdarynyń kandıdaty, professor m.a. Aqgúl Jubandyqova.
Aıta keteıik, ekinshi Halyqaralyq pedagogıkalyq oqýlary aıasynda ótkizilgen «Úzdik pedagogıkalyq ónim – 2021» baıqaýy M.H. Dýlatı atyndaǵy Taraz óńirlik ýnıversıtetinde uıymdastyryldy.
Is-sharanyń maqsaty – Qazaqstan Respýblıkasy bilim berý men ǵylymdy damytýdyń 2020-2025 jyldarǵa arnalǵan memlekettik baǵdarlamasy aıasynda úzdiksiz pedagogıkalyq bilim berý júıesin modernızasııalaý, Qazaqstannyń rýhanı jańǵyrý baǵytynda ulttyq sanany qalyptastyrý, bilim berýdiń jahandaný jaǵdaıynda pedagogıkalyq kadrlardy kásibı daıyndaýdyń teorııalyq-ádisnamalyq negizderin qarastyrý.