Qostanaıdaǵy «Baıan sulý» kondıterlik fabrıkasynda búginde 1 myńnan astam qyz-kelinshek eńbek etedi. Kompanııanyń óndiristik bólim bastyǵy Natalıa Shapovalova – irgeli kásiporynnyń toqsanynshy jyldardaǵy toqyraý kezeńine de, keıin memlekettiń qoldaýymen kelgen fabrıkanyń jańarý, jańǵyrý, órkendeý dáýirine de kýá bolǵan tájirıbeli maman.
Búginde alty birdeı óndiristik sehtyń jumysyn basqaratyn bilikti mamannyń alǵashqy eńbek joly da osy kásiporynda bastaldy. Tipti, Natalıa Nıkolaevnanyń búkil otbasynyń taǵdyry «Baıan sulýmen» tyǵyz baılanysty desek bolady. О́zi atalǵan kásiporynda 35 jyldan beri eńbek etip keledi. Joldasy osyndaǵy jylý qazandyqtarynyń jumysyn baqylaıdy. Úlken uly da eńbek jolyn osy jerde bastady. Al qyzy búginde fabrıkanyń bildeı bir ınjener-tehnology.
– Men baqytymdy eńbekten tapqan áıelmin. 18 jasymda Almaty polıtehnıkalyq ınstıtýtyn támamdaǵan soń, meni joldamamen Qostanaı kondıterlik fabrıkasyna jumysqa jiberdi. Sodan bergi búkil sanaly ǵumyrym fabrıkanyń óndiristik jelilerinde ótti. 1986 jyldan 2013 jylǵa deıin aýysym sheberiniń kómekshisi bolyp jumys istedim. Keıin aýysym sheberi, sehtyń aǵa tehnology, sapa jónindegi bas maman, bıskvıt sehynyń bastyǵy qyzmetterin atqardym. Qazir óndiristik bólimdi basqaramyn. Osy jerde eńbek ete júrip, joldasymdy kezdestirdim, shańyraq quryp, ósip-óndik. Úsh nemerem bar, – dedi Natalıa Shapovalova.
Kásiporynda osydan 2-3 jyl buryn bes birdeı tehnologııalyq jeli ornatylǵan. Byltyr taǵy bireýi iske qosyldy. Jańa jeli karamel táttileriniń jyldyq ónimin 4 myń tonnaǵa deıin arttyrýǵa múmkindik berip otyr. Ár sehta 300-ge deıin jumysshy bar. Bólim basshysy eki aýysymda jumys isteıtin árbir adamnyń tilin taýyp, kerek kezinde kómek qolyn sozyp, úlken ujymdy bir otbasyndaı uıytyp ustap, eńbekke jumyldyryp otyr. О́ndiristik máselelerdi shuǵyl sheship tastaıtyn qasıeti men ózgelerge úlgi bolarlyq tabandylyǵyn, eńbekqorlyǵy men uıymdastyrýshylyq sheberligin bylaı qoıǵanda, Natalıa Shapovalovany fabrıka ujymy ádil basshy, adamgershiligi zor áriptes retinde qurmetteıdi.
– Natalıa Nıkolaevnanyń jumystyń barlyq ýchaskesine qalaı úlgeretinine qaıran qalamyz. Bir aýysym ketip jatsa, ekinshi aýysym kelip jatady, odan úshinshi aýysym bastalady. Jumysshylar aýysqanymen jumys toqtamaıdy. Biraq bizde aýyspaıtyn bir-aq maman bar, ol – óndiristik bólimniń basshysy Natalıa Nıkolaevna. Kúni-túni jumys basynda júrse de sharshaýdy bilmeıtin ol únemi ashyq, jaıdary minezimen jan-jaǵyna jiger berip, ujymdy jumysqa jumyldyryp júredi. О́ndiristik jáne basshylyq jumysta mol tájirıbesi bar, bárine syıly. Bizdiń jelilerdiń daıyn ónimdi shyǵarý jáne tehnologııalyq qurylǵylardyń óndiristik qýatyn arttyrý barysynda joǵary kórsetkishterge qol jetkizýi osy kisiniń arqasy. Natalıa Shapovalova basqaratyn sehtarda ónim assortımenti únemi keńeıtilip, jańartylyp otyrady. Munyń syrtynda, óndiriske qanshama jańa ónimder shyǵarylyp jatyr. «Baıan sulý» ónimderiniń naryqta joǵary suranysqa ıe bolýyna da osy kisi erekshe úles qosyp keledi, – deıdi áriptesteri.
Qostanaılyq kásiporyn kondıterlik ónimderdiń 250-den astam túrin shyǵarady. «Baıan sulý» byltyr tutynýshylaryna táttiniń badam, jańǵaq qosylǵan birneshe jańa túrin usyndy. Bul jobanyń basy-qasynda da Natalıa Shapovalova júrdi.
– Byltyr bizde shokolad ónimderin shyǵaratyn eki birdeı jańa seh paıdalanýǵa berildi. Qazir Qazaqstannyń qaı túpkirine barsań da, bizdiń táttilerdi kezdestire alasyń. «Baıan sulý» táttileri syrtqy naryqta da ótimdi. Qostanaı kámpıtterin negizinen Reseı, Qyrǵyzstan, О́zbekstan, Tájikstan sııaqty TMD memleketteri men Germanııa tutynady. Keıin olardyń qataryna Qytaı qosyldy. Nemister burynnan kele jatqan klassıkalyq shokoladtarymyzdy, al qytaılar kóbine karamelderimizdi unatady. Reseıdiń shekaralas aımaqtary bizdiń karamelderimiz ben vaflı ónimderin, shokoladtarymyzdy attaı qalap alyp ketip jatady. Qostanaı ónimderiniń basty ereksheligi, hımııalyq qospasy az. Tabıǵı jáne baǵasy da qoljetimdi. Bizdiń basty ustanymymyz – naryqty sapaly ónimmen jaýlap, básekede des bermeý. Sol úshin de jyl saıyn jańa jeliler paıdalanýǵa berilip, ónim túrlenip otyrady, – deıdi bilikti maman.
Bólim basshysynyń aıtýynsha, qostanaılyq fabrıka 2020 jyly 46 myń 300 tonna kondıter ónimin shyǵarǵan. Onyń 30 paıyzdan astamy shetelge saýdalanypty. «Baıan sulý» bıyl óndiris aýqymyn keńeıtip, 50 myń tonna ónim shyǵarýdy kózdep otyr. Kásiporynnyń óndirisine pandemııa da keri áser ete alǵan joq. Mundaǵy óndiristik jelilerde sanıtarlyq qaýipsizdik talaptary qatań saqtalady jáne jumysshylardyń densaýlyǵyn saqtaý máselesi eń birinshi kezekte turady. Kásiporyndaǵy árbir sehta sanıtarlyq baqylaý pýnktteri jumys isteıdi. Kire-beristerge sapaly sanıtaızerler ornatylǵan. Sehqa kirgen-shyqqan jumysshylardyń bári sanıtarlyq tekserýden ótedi.
– Bizdiń ujymnyń basym bóligi – negizinen áıelder. Tipti, bizdiń táttilerdiń ataýlary da kóbine áıel tabıǵatymen baılanysty bolyp keledi. Rasynda, «Baıan sulý» búginde meniń óz otbasym sııaqty bolyp ketti, búkil taǵdyrym osy kásiporynmen sabaqtasa órilip keledi. Joldasymmen de, ul-qyzymmen de úıden góri jumys basynda jıi kezdesemiz. Áıeldiń qolynan shyqqan dám qashan da berekeli bolady. Bizdiń táttilerimiz ár otbasynyń bereke-yryzdyǵyn asyryp, qýanysh pen baqyttyń shashýy bola bersin, – deıdi Natalıa Shapovalova.
Qostanaı oblysy