Tokıodaǵy Olımpıada jáne Paralımpıada oıyndary sheteldik jankúıerlerdiń qatysýynsyz ótýi múmkin. Bul týraly Japonııanyń úkimet músheleri Halyqaralyq Olımpıada komıtetiniń (HOK) basshylyǵymen ótkizgen jıynda málimdedi.
The Mainichi basylymynyń málimeti boıynsha, atalǵan basqosýda Kúnshyǵys eliniń bıligi dál qazirgi jaǵdaıda sheteldik jankúıerlerdi qabyldaı almaıtynyn jetkizgen. Qazir de resmı bılik Olımpııa oıyndaryn tek jergilikti jankúıerlerdiń ǵana qatysýymen ótkizý jáne trıbýnaǵa qansha kórermen kirgizý máselesin talqylap jatyr. Degenmen, bul tek usynys qana. Al naqty sheshim naýryz aıynyń sońynda shyǵarylady.