Premer-Mınıstr Asqar Mamınniń tóraǵalyǵymen ótken Úkimet otyrysynda áleýmettik mańyzy bar taýarlardyń baǵasyn retteý jáne azyq-túlikpen qamtamasyz etý máseleleri qaraldy, dep habarlaıdy Egemen.kz.
Baǵa monıtorıngi jáne áreket etý sharalary boıynsha júrgizilip jatqan jumystar týraly saýda jáne ıntegrasııa mınıstri Baqyt Sultanov pen Básekelestikti qorǵaý jáne damytý agenttiginiń tóraǵasy Serik Jumanǵarın, azyq-túlikpen qamtamasyz etý jóninde aýyl sharýashylyǵy mınıstri Saparhan Omarov baıandady.
2020 jyly Úkimet pen ákimdikter azyq-túlik óndirýdi, saqtaýdy jáne barlyq óńirlerge jetkizýdi qamtamasyz etý boıynsha sharalar keshenin qabyldady. Áleýmettik mańyzy bar taýarlardyń shekti baǵasy belgilendi, «qaıtarymdy shema» arqyly baǵany ósirmeý boıynsha mindetteme alǵan saýda jelilerine jeńildikti qaryz berý tájirıbesi keńeıtildi. Aýyl sharýashylyǵy taýaryn óndirýshilerge memlekettik qoldaý sharalary kórsetildi.
Qabyldanǵan sharalar áleýmettik mańyzy bar taýarlar baǵasynyń ósýin turaqtandyrýǵa múmkindik berdi. Alaıda, bıylǵy qańtardan bastap baǵanyń 2,6%-ǵa ósýi baıqalady. Osyǵan baılanysty áleýmettik mańyzy bar azyq-túlik taýarlarynyń baǵasyn turaqtandyrý boıynsha jol kartasy ázirlendi. Qujat monopolııaǵa qarsy jáne saýda sharalaryn qabyldaýdy, óndiristi ulǵaıtýdy jáne kásiporyndardy qoldaýdy, sondaı-aq birqatar zańnamalyq ózgeristerdi kózdeıdi.
Úkimet basshysy áleýmettik mańyzy bar azyq-túlik taýarlarynyń baǵasyn turaqtandyrý boıynsha jol kartasyn iske asyrýǵa kirisýdi tapsyrdy. Básekelestikti qorǵaý jáne damytý agenttigine árbir taýar pozısııasy boıynsha baǵa belgileý tizbegin egjeı-tegjeıli zerdeleý jáne naryqtyń josyqsyz iri qatysýshylary arasynda sóz baılasýǵa jol bermeý úshin ýaqytyly monopolııaǵa qarsy sharalar qabyldaý, saýda jáne aýyl sharýashylyǵy mınıstrlikterimen, ákimdiktermen birlesip, áleýmettik mańyzy bar azyq-túlik ónimderiniń barlyq túrleri boıynsha baǵanyń negizsiz ósýine jol bermeýge qatań baqylaý ornatý tapsyryldy. Saýda jáne ıntegrasııa mınıstrligine azyq-túlik baǵasynyń ósýine áser etetin taýarlar men shıkizattyń eksporty men ımportyna qatysty saýda sharalary boıynsha usynystar engizý tapsyryldy. Bul rette Ulttyq taýar ótkizý júıesin qurýdy, onyń ishinde kóterme-taratý ortalyqtaryn qurýdy, sondaı-aq saýda prosesterin sıfrlandyrýdy jedeldetý qajet.
Aýyl sharýashylyǵy mınıstrligine ishki naryqty orta merzimdi perspektıvada azyq-túlik taýarlarymen tolyqtyrý jónindegi keshendi jospar qabyldaýdy qamtamasyz etý, ákimdiktermen birlesip, offteık-kelisimsharttar men forvardtyq satyp alý aıasynda «Azyq-túlik korporasııasy» UK» AQ azyq-túlik taýarlarynyń jekelegen túrlerin satyp alý máselelerin pysyqtaý, áleýmettik mańyzy bar azyq-túlik taýarlaryn óndirýshilerge memlekettik qoldaý sharalaryn kórsetý, onyń ishinde sýbsıdııalaýdy, óndirýshilerdiń qarsy mindettemelerin belgileýdi qarastyrý tapsyryldy.
Premer-Mınıstr ákimdikterge Turaqtandyrý qorlarynyń qyzmetinde forvardtyq satyp alý shemasyn qoldanýdy, «qaıtarymdy shemaǵa» qarajat bólýdi eleýli túrde ulǵaıtýdy, ımportqa táýeldi taýarlar óndirisin ulǵaıtý boıynsha jobalardy basym túrde iske asyrýdy, óte qajetti aýyl sharýashylyǵy daqyldarynyń (qaraqumyq, maıly daqyldar, baqsha, jem-azyq daqyldary) egis alqaptaryn ulǵaıtýdy tapsyrdy.