QR Densaýlyq saqtaý mınıstri mereke kúnderi qarsańynda qazaqstandyqtarǵa úndeý jasady. Alekseı Soıdyń aıtýynsha Kúz ben kóktemde jiti respıratorlyq vırýsty ınfeksııa (rınovırýs, adenovırýs, paragrıpp vırýs jáne basqalary) asqynady.
«Qazir JRVI maýsymy jalǵasýda, sondyqtan syrqattaný qaýpi seıilgen joq. Qyrkúıek pen qańtar aralyǵynda elimizde taralǵan KVI vırýsyn genomdyq zertteý nátıjesi boıynsha koronavırýstyń («brıtandyq», «Ońtústik Afrıka», «Brazılııalyq») jańa shtamy anyqtalǵan joq. Alaıda, halyqaralyq áýe qatynasy qaıta ashylǵanyn, shetelge shyǵatyn el azamattary (eńbek kóshi-qony, oqytý, emdeý, týrızm), sondaı-aq jaqyn jáne alys shetelderden kelgenderdiń qatary kóbeıgenin eskergen jón. Iаǵnı, koronavırýs ınfeksııasynyń jańa shtamdaryn tasymaldaý qaýpi de artady degen sóz», dep jazdy Alekseı Soı Facebook-tegi paraqshasynda.
Mınıstrdiń aıtýynsha, áleýmettik-ekonomıkalyq nysandardaǵy shekteý sharalarynyń jeńildetilýi, halyqtyń belsendiligi (áleýmettik ara qashyq, maska taǵý rejımi jáne t.b. saqtalmaıdy) koronavırýs ınfeksııasynyń taralý qaýpin údetýi múmkin.
«Amerıkalyq jáne reseılik ǵalymdardyń ǵylymı zertteýlerine sáıkes, koronavırýs ınfeksııasymen aýyratyndardyń tek 10-15 paıyzynda turaqty ımmýnıtet qalyptasqan. COVID-19 juqtyrǵan naýqastarda ımmýnıtet pasıenttiń jasyna qaraı qalyptasady: ımmýnıtet balalarda jaqsy damıdy - kámeletke tolmaǵandar arasynda ımmýnıtet shamamen 20% bolady. 18-den asqan adamdarda -14%, 65 jastan asqandarda -11%. 40%-da ımmýnıtet óte álsiz jáne ınfeksııa qaıtalanǵanda kómektese almaıdy. Immýnıtettiń saqtalý uzaqtyǵyna qatysty ǵylymı dáleldengen derek joq, sondyqtan Covid-19-dan saýyqqan adamdarda aýrýdy qaıta juqtyrý múmkindigi kún saıyn artyp keledi. Aıta ketý kerek, karantınge koronavırýs ınfeksııasyna qarsy vaksınasııa ǵana balama bola alady», dedi mınıstr.
Onyń aıtýynsha, 2021 jyldyń 1 aqpanynan elimizde KVI-ge qarsy «Spýtnık V» ekpesimen vaksınasııa bastalǵan.
«Vaksınasııa kezeń-kezeńimen júzege asyrylady. Birinshi kezekte, koronavırýs ınfeksııasyn juqtyrý jáne taratý qaýpi joǵary azamattar (medısına qyzmetkerleri, pedagogtar, kúsh qurylymdarynyń qyzmetkerleri) ekpe saldyrady. Sáýir aıynan halyqtyń osal toptaryn (sozylmaly aýrýlary bar adamdar, 65 jastan asqandar jáne halyqtyń basqa da toptary) vaksınasııalaý josparlanýda. Eger halyq jappaı KVI-ge qarsy profılaktıkalyq ekpe saldyrsa, ujymdyq ımmýnıtet qalyptasady jáne ınfeksııanyń taralýyn toqtatýǵa múmkindik týady», dedi ol.
Mınıstri halyqtan saqtyq sharalaryn saqtaýdy, adam kóp jınalatyn oryndarǵa barmaýǵa shaqyrdy.
«Qurmetti qazaqstandyqtar, koronavırýs ınfeksııasyn juqtyrý qaýpi áli de joǵary! О́zińizdiń jáne jaqyndaryńyzdyń densaýlyǵyn qorǵaý úshin mynadaı saqtyq sharalaryn saqtaýdy suraımyn:
- adam kóp jınalatyn oryndarǵa barmańyzdar;
- ujymdyq is-shara, mereıtoı, korporatıvtik jıyn jasaýǵa bolmaıdy;
- aǵzańyzǵa sýyq tıgizip almaýǵa tyrysyńyz;
-ózgelerge qaýip tóndirmeý úshin jaqyndaryńyzben alystan aralasyńyzdar, zamanaýı baılanys quraldarymen habarlasqan durys.
Pandemııa áli de jalǵasýda, vırýs jeńilgen joq, sondyqtan ár adam jaǵdaıǵa barynsha jaýapkershilikpen qaraý kerek. О́zgelerge aýrý juqtyrmaýdyń jolyn izdegen durys, maska kıip, áleýmettik araqashyqty jáne gıgıena talaptaryn saqtaýǵa shaqyramyn. Árıne, mindetti túrde vaksınasııa da qajet», dedi mınıstr.