Almatyda aqpan aıynda Spýtnık-V ekpesin josparly túrde salý qolǵa alynǵaly beri 10 myńǵa jýyq maman vaksına alǵan. Búgin Almaty qoǵamdyq densaýlyq basqarmasynyń basshysy Narıman Tabynbaev sáýirde koronavırýsqa qarsy ekpeniń 30 myń dozasy qoljetimdi bolǵan kezde, ekpe alatyndardyń tizimi kóbeıetindigin atady.
Aldymen sozylmaly keselderi bar – júrek, qan tamyrlary jáne baýyr aýrýy boıynsha dıspanserlik esepte turǵandarǵa vaksına salynady. Qala jetkilikti túrde ekpemen qamtamasyz etilse, turǵyndardy jappaı vaksınasııalaý qolǵa alynady.
«Taıaý ýaqytta ózimizdiń otandyq vaksınany da koronavırýsqa qarsy qoldanamyz. Sondaı-aq, Úkimet tarapynan qytaılyq jáne amerıkalyq vaksınany elge ákelý máselesi talqylanyp jatyr. Qazir kelissózder júrgizilýde. Biz osy ekpege úlken úmit artyp otyrmyz. Halyqty barynsha jappaı ekpemen qamtamasyz etsek, indettiń taralýyn barynsha tejeýge múmkindigimiz bar. Sondyqtan jalpy halyqtyq vaksınasııa máselesi biz úshin óte ózekti», – dedi Narıman Tabynbaev.
Qalanyń bas dárigeri Almatyda aqpanda 1 750 medısına qyzmetkeri egilip, barlyǵy da revaksınasııadan ótkeni atady. Al ekinshi kezeń 2021 jyldyń 1 naýryzynda bastaldy. Bul kezeńge Spýtnık-V vaksınasynyń qosymsha 10 800 dozasy alyndy. Qazirgi tańda 6 550 adamǵa ekpe salynsa, olardyń 60 paıyzy – «qaýipti aımaqta» jumys isteıtin medısına qyzmetkerleri, 18 paıyzy – ustazdar, 12 paıyzy – quqyq qorǵaý organdarynyń qyzmetkerleri.
Narıman Tabynbaev koronavırýsqa qarsy ekpe memlekettik bıýdjet esebinen júrip jatqandyǵyn málimdedi.