Búgin О́KK brıfınginde qalalyq «Baqytty otbasy» ortalyǵynyń basshysy Zýlfııa Baısaqova kóp balaly analarǵa qoldaý kórsetý sharalary týraly baıandady, dep habarlaıdy Egemen.kz
Kómekke muqtaj otbasylaryn jan-jaqty qoldaý maqsatynda, 2019 jyldyń tamyz aıynan bastap Almaty qalasynyń ár aýdanynda «bir tereze» qaǵıdaty boıynsha «Baqytty Otbasy» ortalyqtary jumys atqaryp keledi. Búgingi kúni qalanyń ár aýdanynda ornalasqan 9 ortalyqtyń esigi ashyq.
Bıylǵy 15 qańtarda «Baqytty Otbasy» qalalyq ortalyǵynyń qyzmetin júzege asyrý maqsatynda «Daǵdarys ortalyqtarynyń odaǵy» zańdy tulǵalar birlestigimen kelisim-shart jasaldy. Bıylǵy jyldyń 7 aqpanynan bastap aýdandyq Ortalyqtardyń qyzmetin júzege asyrý úshin «AQ-ALEM – Analardyń quqyǵyn qorǵaý» QQ-men (Alataý aýdany), «Bilim berý tehnologııalary men bastamalary qory» QQ-men (Almaly aýdany), «Asyl Júrek bilimdi, densaýlyq saqtaýdy, mádenıet jáne sportty qoldaý ortalyǵy» QQ-men (Áýezov aýdany), «Keńes» MQB-men (Bostandyq aýdany), «Zııalylar» QQ-men (Jetisý aýdany), «ISKER qoldaý Ortalyǵy» QQ-men (Medeý aýdany), «Qazaq-german baǵdarlamasy túlekteriniń qaýymdastyǵy» QB-men (Naýryzbaı aýdany) jáne «Túrksib aýdandyq kóp balaly otbasylar odaǵy» QB-men (Túrksib aýdany) kelisimsharttar jasaldy.
Bul ortalyqtarda kóp balaly jáne az qamtylǵan otbasylar kelesi mamandardyń keńesterin tegin túrde ala-alady:
- zańgerlerdiń turǵyn úı qatynastary, AÁK tirkeý, qujattardy qalpyna keltirý, alımentter jáne t.b suraqtary boıynsha;
- psıhologtardyń balalardy tárbıeleý, trenıngter ótkizý, qıyn ómirlik jaǵdaıdan shyǵý, otbasy ishindegi janjaldardy sheshý jáne t.b máseleler boıynsha;
- áleýmettik qyzmetkerlerdiń otbasynyń qajettilikterin anyqtaý, jeke jumys josparyn qurý jáne t.b;
- 2 aıdan bastap 5 jasqa deıin balalardy qabyldaıtyn joǵary sanatty pedıatr jáne balalardyń densaýlyǵyna baılanysty jıi kezdesetin máseleler boıynsha profılaktıkalyq áńgimeler (dıareıa, bezgek, qulaq, tamaq keselderi).
Sonymen qatar, «Baqytty Otbasy» Ortalyqtarynda: (aǵylshyn tilin úırený, vızaj, massaj, shashtaraz, pishý jáne tigý, gımnastıka, aspazdyq, toqyma, tigin sómkeleri, kompıýterlik biliktilik jáne t.b) kýrstar, túrli baǵyttar boıynsha balalarǵa arnalǵan úıirmeler (art-terapııa, gımnastıka, matematıka jáne logıka, shahmat, aǵylshyn, toqý, logoped qyzmeti) kýrstary tegin túrde ótkiziledi.
Osy ýaqytqa deıin «Baqytty otbasy» Ortalyqtarynda 33 myńnan astam adam tirkelip, 54 myń adamǵa – aqparattyq-keńestik kómek jáne resýrstyq qoldaý kórsetildi, 29 myń adamǵa – ádistemelik jáne zańgerlik kómek, 4 myń adamǵa – salaýatty ómir salty bólmesiniń qyzmeti usynylǵan. 29 myń adam – «Baqytty otbasy» Ortalyǵynyń bazalyq trenıngterinen ótti, 20 myńnan astam adam oqytý kýrstarynan ótken kórinedi.