«Bugin-ekologııa» jobasy kóshet otyrǵyzýǵa shaqyrady

Qaladaǵy kóshbasshy áıelder qosylǵan sharaǵa Almaty qalasy jasyl ekonomıka basqarmasy men Jetisý aýdany ákiminiń apparaty muryndyq boldy. Jasyl ekonomıka basqarmasy kóshettermen, qajetti qural-saımandarmen qamtamasyz etti.

«Qazirgi álemde áıelderdiń róli erler sııaqty mańyzdy. Búginde áıelder qoǵam ómirinde, qalalarda, saıasatta, ekonomıkada, medısınada jáne basqa da salalarda bar. Búgin áıelderdi sımvoldyq túrde aǵash otyrǵyzýǵa shaqyrdyq jáne bul jerge «Áıelder alleıasy» degen ataý qoıdyq. Bul erkindiktiń, danalyqtyń, sulýlyq pen batyldyqtyń sımvoly», dedi jasyl ekonomıka basqarmasynyń bastyǵy Natalıa Lıvınskaıa.

Áıelder alleıasy Jetisý aýdanynyń Kókjıek shaǵyn aýdanynda ornalasqan. Bul aýmaqqa barlyǵy 4 500 kóshet otyr­ǵyzylady. Kógaldandyrýdyń nátı­je­sinde bul aýmaq damıdy. Jasyl eko­nomıka basqarmasynyń ókilderi aǵash otyrǵyzyp qana qoımaı, eki jyl boıy kútip-baptaýdyń mańyzdy ekenin jetkizdi. Otyrǵyzylǵan jasyl jelekterdi únemi sýarý, butalaý, mı­neraldandyrý jáne topyraqty qopsytý qajet. Bıyl Almatyda 350 myń aǵash otyrǵyzý josparlanǵan. Al úsh jyldyń ishinde 1 mln jasyl jelek otyrǵyzylady.

«Atadan mal qalǵansha tal qalsyn» degen halqymyz aǵash otyrǵyzýdy ba­la tárbıesimen teń kórgen. Búginde eko­logııanyń tazalyǵyna kóńil bólý – ózekti másele. Almaty ekologııalyq lastaný jaǵynan aldyna qala salmaıdy. Máselen, 2020 jyldyń aqpanynda Ekologııa, geologııa jáne tabıǵı resýrs­tar mınıstri Maǵzum Mırzaǵalıev me­gapolıste atmosferany lastaıtyn qaldyq zattyń kólemi 2,4 mln tonnany quraǵanyn aıtty. Mınıstr eger esh­qandaı shara qoldanylmasa, bul kórsetkish 2030 jylǵa qaraı 3,6 mln tonnany quraıtynyn málimdedi. Osy oraıda Bugin Association qoǵamdyq birlestigi «Bugin-ekologııa»  kógaldandyrý jobasy aıasynda Almaty qalasyn kógaldandyrý isin qolǵa aldy. Bul shara 20 naýryzda Jeltoqsan saıabaǵynan bastaý alady. Joba jetekshisi Álibek Qaıratuly: «Kelip óz aǵashyńyzdy otyrǵyzyńyz! Biz sizdi kútemiz!», deıdi. Bul joba tal egip, aǵash otyrǵyzý arqyly qoǵamǵa ıgi is ja­saýdy kózdeıdi. Bastama 1,5 mln teńge qarajatty qajet etetin bolsa, onyń jar­tysyn Bugin Holding kompanııa­sy ber­gen. Al qalǵan qarajatty qoǵam erik­tileri jınap jatyr.

Sondaı-aq sońǵy kúnderi qaladaǵy Gagarın men Berezovskıı kósheleriniń qıylysynda jaıqalyp turǵan úsh te­rektiń zańsyz kesilýi turǵyndar nara­zalyǵyn týdyrdy. Aǵashtardy kesýge baılanysty jasyl ekonomıka bas­qar­masyna ótinish túspegen. Tabıǵat qorǵaý prokýratýrasynyń málimetinshe, aǵashty zańsyz kesýshilerge QR ÁQBtK-niń 386-baby «Jasyl jelekterdi kútip-ustaý jáne qorǵaý erejelerin buzý» boıynsha ákimshilik hattama toltyrylyp, aıyppul salyndy.

Endigi jerde kesilgen aǵashtardyń ornyna ótemaqy retinde 60 kóshet otyr­ǵyzylady.

ALMATY