Naýryz merekesi qarsańynda Qostanaıdaǵy I.Omarov atyndaǵy qazaq drama teatry «Maqta qyz» ertegisin sahnalady. Uly aǵartýshy Ybyraı Altynsarınnyń balalarǵa arnalǵan áıgili shyǵarmasyn qazirgi zamanǵa saı túrlendire otyryp, sahnaǵa ıkemdep qaıta jazyp shyqqan qalamger – aqyn, dramatýrg Abylaı Maýdanov.
- Buǵan deıin uly aǵartýshynyń atalmysh ertegisiniń jelisimen oblystyq qýyrshaq teatry úshin shaǵyn qoıylym ssenarııin jazǵan edim. Bıyl sonyń mazmunyn keńeıtip qaıta jazyp shyqtym. Bastysy, qazirgi balalardyń tanym-túsinigine sııatyndaı, qarapaıym ári qyzyqty oqıǵalarǵa negizdeı otyryp jeńil jazýǵa tyrystym. Qazaq drama teatrynyń rejısseri Dos Qubash mýzykalyq jáne bı kórinisterimen árlep, ádemi qoıyp shyqty. Qoıylymda aýylǵa – ata-ájesine qaladan qydyryp kelgen bala uıaly telefonynan aıyrylǵan soń, shóptiń qalaı jınalatynyn, sıyrdy qalaı saýatynyn, aǵashtyń qalaı ósetinin, jumyrtqanyń qaıdan shyǵatynyn óz kózimen kórip, aýyldyń shynaıy turmys-tirshiligimen tanysady. Jalpy, merekelik qoıylym kishkentaı kórermenderdiń kóńilinen shyqty, soǵan qýandym, - dedi Abylaı Maýdanov.
Balalarǵa arnalǵan merekelik qoıylymnyń bir ereksheligi – sahnadaǵy keıipkerler men zaldaǵy balǵyn kórermender qosylyp án salyp, bı bılep, ertegi álemine birge saıahat jasaıdy. Teatr tartý etken merekege balalaryn ertip kelgen ata-analar da dán rıza. «Naýryz meıramy bolǵan soń, nemeremdi jýantaıyn dep, sonaý Denısov aýdanynan kelip turmyz. Búgingi qoıylymnan tamasha áser aldyq. Nemereme de unady. Sahnadaǵy ertegi keıipkerlerimen birge kishkentaı kórermenderdiń barlyǵy bı bılep, ýaqyttyń qalaı ótkenin bilmeı qaldyq. Osyny kórip, qýanyp otyrmyn. О́zim de «Qara jorǵany» bılep, kóńilim kóterilip, bir sergip qaldym. Osy sátti paıdalanyp, barsha qostanaılyqtardy Ulystyń uly kúnimen quttyqtaımyn! Aspanymyz ashyq, otbasymyz aman bolsyn! Balalarymyzǵa búgingideı tálim-taǵylymǵa toly, kóńildi ári áserli qoıylymdy tartý etken qazaq drama teatryna alǵysymyz sheksiz!» dedi kórermen ájeılerdiń biri.