Naýryz meıramy qarsańynda Qostanaıdaǵy múmkindigi shekteýli jandar men turmysy tómen jáne kóp balaly otbasylarǵa merekelik bazarlyq retinde azyq-túlik sebetteri taratyla bastady. Meıirim-shýaqqa toly Ulystyń uly merekesine oraı uıymdastyrylǵan janashyrlyq sharasyn «Halyq» qaıyrymdylyq qory men volonterlar júzege asyrýda.
Azyq-túlik sebetterin muqtaj jandardyń mekenjaıyna «Janashyr bol», «Grın» qoǵamdyq qorlary men «10-regıon» izdestirý jasaǵynyń ókilderi, sondaı-aq, stýdentter jetkizip berip jatyr.
Mysaly, «Janashyr bol» QQ-nyń eriktileri bir kúnde erekshe qajettilikke ıe balalardy tárbıelep otyrǵan 15 otbasyna azyq-túlik jetkizip berdi.
Qaıyrymdylyq aksııasyn uıymdastyrýshylardyń aıtýynsha, muqtaj turǵyndarǵa úlestirilgen ár sebette 5 kg qaraqumyq jarmasy, 5 kg kúrish, 10 kg qant, 10 kg makaron, 10 kg un, 5 lıtr kúnbaǵys maıy, 2 kg qara shaı, 1,6 kg konservilengen et jáne 2 kılo kámpıt bar.
Aksııanyń alǵashqy kúni 50 shaqty volonter 100-den astam mekenjaıǵa azyq-túlik jetkizdi. Qaıyrymdylyq sharasy aıasynda Naýryz merekesi kúnderi 1000-nan astam otbasy azyq-túlik alatyn bolady.