Ulttyq Banktiń banknottar men monetalarǵa saraptama jasaý basqarmasynyń basshysy Ashat Ábishev ótken jyly jalǵan banknottar aınalymy 2019 jylmen salystyrǵanda 38%-ǵa azaıǵanyn málimdedi, dep jazady Egemen.kz.
Ulttyq bank ókili habarlaǵandaı, 2020 jyly 823 jalǵan banknot aınalymǵa shyqsa, 2019 jyly bul kórsetkish 1 319 banknotqa deıin ósken. Ashat Ábishev naqtylap ótkendeı, tómendeýge áser etken negizgi sebep – qazirgi karantındik sharalar men shekteýler, óıtkeni, qoldan aqsha jasaıtyndar ádette jalǵan aqshany bazarlarda, janarmaı quıý beketterinde jáne shaǵyn azyq-túlik dúkenderinde ótkizip jiberedi. Qoldan kóp jasalatyn aqshaǵa 2 000 jáne 5 000 teńgelik banknottar jatady – sáıkesinshe, jalpy kólemniń 42,5% jáne 37,6%.Aıta keteıik, jalǵan banknottardyń kóp bóligi Almatyda (554 dana, nemese 67,3%), az mólsheri elimizdiń batys óńirinde anyqtalǵan.