Almatyda indettiń beleń alyp turǵanyna, vaksınasııaǵa baılanysty Almaty qalasy qoǵamdyq densaýlyq Basqarmasynyń ókili, telemedısına Ortalyǵynyń dırektory Laýra Myrzaǵalı О́ńirlik kommýnıkasııalar qyzmetiniń alańynda jýrnalısterdiń saýaldaryna jaýap berdi, dep habarlaıdy Egemen.kz
Brıfıng kezinde birqatar saýaldar vaksınasııaǵa qatysty boldy. Tek osy naýryz aıynda Almatyǵa aldymen 10800, artynsha 16200 doza vaksına jetkizilgen. Densaýlyq saqtaý mınıstrliginiń aldyn ala bólgen kestesi boıynsha, Almaty sáýir aıynda – 65200, mamyrda – 65200, maýsymda – 67 000 dozamen qamtamasyz etilýi tıis.
Qazir Almatyda vaksına salatyn 35 kabınet jumys istep tur, aldaǵy kúnderi bazarlar men iri saýda oryndarynda 15 kabınet uıymdastyrý kózdelinip otyr. Ekpe jasaıtyn oryndar jekemenshik uymdardyń suranysyna saı jasaqtala bermek.
KVI-ge qarsy ekpe saldyrǵan adam, qalypty ómirin jalǵastyra bere me, monshaǵa túsýge, alkogoldi ishimdikter ishýge, temeki tartýǵa bola ma degen de saýaldar bar.
Laýra Myrzaǵalıdyń aıtýynsha, vaksına ár adamǵa ártúrli áser etedi. Biraq halyq vaksınasııa jasatýdyń mańyzdylyǵyn birtindep túsinip keledi.
«Koronavırýs vaksınasy adamnyń aǵzasyna qaraı reaksııa beredi. Bireýde jeńil, endi bireýinde aýyr ótýi múmkin. Men de vaksına saldyrdym. Jeńil ótti. Qorqýdyń qajeti joq. Tek orny ǵana aýyrdy. Bala kezimizden bárimiz de ekpe jasatyp kele jatyrmyz. Qalaı bolǵanda da bastapqy 3-4 kún kútingen durys. Al menimen birge saldyrǵan áriptesterimniń keıbireýiniń dene qyzýy kóterildi, endi birinde qaltyraý boldy. Dene qyzýy kóterilse, ony túsirýge kómektesetin dáriler bolady. Olar antıbıotık emes, dene qyzýyn túsirýge arnalǵan parasetamol, ıbýprofen sekildi preparattar. Solardy ishýge bolady. Monshaǵa baryp, sportpen aınalysýǵa da ruqsat. Biraq birinshi kezekte dene qyzýyn túsirý kerek. Odan keıin vaksına saldyrǵannan keıin úsh kúndeı monshaǵa túsýge, sý tıgizýge bolmaıdy. Sol tártipti saqtaý qajet. Odan keıin adamnyń jaǵdaıyna qaraı shomylýǵa bolady. Ár nárse óz ornymen», deıdi Laýra Myrzaǵalı.
Máselen, áriptesterimizdiń tarapynan ekpe jasatýdan bas tartqandardyń dozasy qalaı jumsalady degen saýalǵa spıker tómendegideı jaýap berdi.
Árıne, ekpe jasatýdan bas tartatyndar az da bolsa, tabylady. Esesine, indetke qarsy ekpe jasatýdyń qajet ekendigin túsinip jatqandar kóbeıip keledi. Sondyqtan da basy artyq, kereksiz jatqan doza joq.
Qazirgi kúnderi Almatyda densaýlyq saqtaý mınıstrligi belgilep bergen adamdarǵa vaksınasııa jasalyp jatyr. Olar medısına qyzmetkerleri, muǵalimder, áskerı jáne polısııa qyzmetkerleri, stýdentter, mektepke deıingi uıymdardyń qyzmetkerleri, dıspanserde esepte turǵan adamdar.