Ulystyń Uly kúni qarsańynda Qostanaı qalasynyń turǵyny, óńirge belgili qolóner sheberi Raıhan Rahalıeva oblystyq tarıhı-ólketaný mýzeıine uzyndyǵy 21 metr bolatyn erekshe kórpeni syıǵa tartty.
Erekshe tartý Naýryz merekesine oraı mýzeı qyzmetkerleri uıymdastyrǵan kórpeler kórmesiniń kózaıym eksponatyna aınaldy. «21 sany – úsh jetiden turatyn nyshandyq belgi. Jeti ata, jeti qazyna, jeti ǵalam, jeti qat jer, jeti amal, jeti kún sııaqty halyq uǵymdaryndaǵy kıeli 7 sanynyń orny erekshe. Naýryz kóje de 7 dámnen turady» deıdi sheber.
On saýsaǵynan óner tamǵan ismerdiń qolynan shyqqan uzyn kórpe qoshqar múıiz oıýymen kestelenip, qyzyl-jasyl tústi masaty matamen tystalǵan.
35 jyl boıy qolónerdi serik etken Raıhan Rahalıeva tikken sándi ulttyq kıim úlgileri men qorjyn, shabadan, qus jastyq, kórpeshe sııaqty turmystyq buıymdardy turǵyndar attaı qalap alyp ketip jatady. Ismerdiń qolynan shyqqan óner týyndylary Qazaqstan, Reseı, AQSh, Túrkııa, Italııa memleketterindegi jeke kolleksııalardyń tórinen oryn alǵan.
Sheber aldaǵy ýaqytta Gınnestiń rekordtar kitabyna enetin eń uzyn kórpe qurastyryp shyǵarýdy kózdep otyr.
Qostanaı oblysy