Kóktem kelip, kún jylyǵan shaqta tabıǵattyń tosyn minez tanytýy múmkin. Jambyl oblysynda da kúnniń kúrt jylynýy saldarynan sý tasqyny bolýy yqtımal ekeni eskertilýde. Al, oǵan óńir qanshalyqty daıyn?
Jambyl oblystyq tótenshe jaǵdaılar departamenti tótenshe jaǵdaılardyń aldyn alý basqarmasynyń bastyǵy, azamattyq qorǵaý polkovnıgi Talǵat Aıtbaevtyń aıtýynsha, aımaqta tabıǵı tasqyn kezinde sýdyń apatsyz ótýin aldyn alý sharalary tyńǵylyqty júrgizilýde eken. Sonymen qatar, basqarma bastyǵy 1207 shaqyrym drenajdy kanal jáne aryq júıelerin qoqystan tazartý jumystarynyń atqarylǵanyn, al, avtokólik jáne temir joldarynyń boıyndaǵy 430 kópir men 1164 sý ótkizý qurylǵylarynyń tazartylǵanyn jetkizdi.
Búginde oblysta sý tasqyny bolýy múmkin birqatar aýdandar bar. Tasqyn Talas, Shý jáne Asa ózenderi arqaly ótedi. Sonymen qatar, taýly aımaqtarda ornalasqan 5 ózenniń erigen qar sýy halyqqa qaýip tóndirýi múmkin. Máselen, olardyń qatarynda Jýaly, Merki, T.Rysqulov, Qordaı jáne Talas aýdandaryndaǵy Qaraqońyz, Yrǵaıty, Aspara, Merke, Qaraqystaq, Qaıyńdy, Aqsaı jáne Kóksaı ózenderi bar. Al, iri sý qoımalary bolyp sanalatyn Kırov, Tasótkel, Teris-Ashybulaq aıdyndarynyń tolýy jiti baqylaýda eken. Búginde Teris-Ashybulaq sý qoımasyna 63 paıyz, Tasótkelge 72 paıyz, Qyrǵyz memleketindegi Kırov sý qoımasyna (Choń-Qaqpa) 72 paıyz jáne Yntalyǵa 78 paıyz sý jınalǵan.
Qazirgi kezde aımaqta 138 myń tonna janar-jaǵarmaı men 11 myń tonna ınertti materıaldardyń qory qurylyp, 65 myńnan astam qaptar daıyndalǵan. Kóshirilgen halyqty ýaqytsha ornalastyrý úshin 41 qabyldaý beketi, ártúrli 139 palatka, jatyn jabdyqtar, 1900 tósek daıyn. Al, der kezinde medısınalyq kómek kórsetý úshin 56 densaýlyq saqtaý nysandary jáne dári-dármek qory daıyndalǵan. Baqylaý júrgizý jáne zardap shekkenderdi kóshirý úshin Taraz áýejaıynda «Qazavııaqutqarý» AQ «ES-145» tikushaǵy kezekshilikte tur.