L.N.Gýmılev atyndaǵy Eýrazııa ulttyq ýnıversıtetiniń Ǵylymı kitaphanasynda Qazaqstan Respýblıkasy Memlekettik Eltańbasynyń avtory Jandarbek Málibekovpen kezdesý ótti, dep habarlaıdy Egemen.kz.
Kezdesý Jýrnalıstıka jáne saıasattaný fakýltetiniń Teleradıo jáne qoǵammen baılanys kafedrasy men ýnıversıtettiń ǵylymı kitaphanasynyń uıymdastyrýymen ótti.
El táýelsizdiginiń 30 jyldyǵy aıasynda Eltańba avtorymen bolǵan kezdesýge jýrnalıstıka jáne saıasattaný fakýltetiniń stýdentteri men «Topjarǵan» jas aqyndar klýbynyń músheleri qatysty. Kezdesýge kópshilik zým qosymshasy arqyly onlaın formatta da qatysyp otyrdy. Is-sharany Ǵylymı kitaphananyń dırektory Baqytjan Orazalıev pen fılologııa ǵylymynyń doktory, professor Serik Negımov ashty. Jandarbek Málibekov memlekettik rámizdiń mańyzyn túsindirip, ýnıversıtettiń ǵylymı kitaphanasyna «Otyrar kitaphanasynyń ujymyna QR 30 jyldyq mereıtoıyna tartý. QR Eltańba avtory J. Málibekov» degen mátinmen qoltańbasy qoıylǵan Eltańbany tartý etti. J. Málibekov kezdesýge qatysqan jastarǵa, sol kezde 245 jobanyń ishinen tańdalyp alynǵan eltańbadaǵy árbir sımvoldyń syryn ashyp, mán-maǵynasyn túsindirip berdi.
Aıta ketý kerek, Jandarbek Málibekov Eltańba avtory ǵana emes, arhıtektýra salasynyń maıtalmany, elordadaǵy kóptegen sáýletti jobalardy júzege asyrǵan maman ekenin kópshilik bile bermeıdi. Sonyń ishinde ol «Nur Astana» meshiti, «Astana-Opera» teatry, «Oitek» arhıtektýrasynyń, «Expo-2017» qalashyǵy men jańa Túrkistan qalasynyń bas josparyn jasaǵan.
Kezdesý sońynda «Topjarǵan» jas aqyndar klýbynyń músheleri Eltańba avtoryna alǵysyn bildirip, jalyndy jyrlaryn oqydy.