Qazaqstandyq mamandar nanotehnologııaǵa negizdep jasaǵan 2 vaksınany Dúnıejúzilik densaýlyq saqtaý uıymy tirkeýge aldy, dep habarlaıdy Egemen.kz QazAqparatqa silteme jasap.
M.Aıqymbaev atyndaǵy asa qaýipti ınfeksııalar ulttyq ǵylymı ortalyǵynyń Facebook-tegi paraqshasynda osyndaı aqparat jarııalandy.
«Seriktesterimizge, Qazaq ulttyq agrarlyq zertteý ýnıversıtetiniń ujymyna jáne rektoryna, Ulttyq Ǵylym akademııasynyń akademıgi, professor Espolov Tilektes Isabaıulyna COVID-19 pandemııasymen kúreske baǵyttalǵan ǵylymı zertteýlerdi tolyq qoldaǵany úshin alǵys bildiremiz. Osy ýaqytqa deıin QazUAÝ halyqaralyq vaksınologııa ortalyǵynyń dırektory Tabynov Qaısardyń jetekshiligimen birikken zertteý toby ortalyq referenttik zerthana bazasynda 2020 jyldyń maýsym jáne jeltoqsan aılarynda SARS-CoV-2 vırýsynyń 12-ge jýyq shtamyn bólip shyǵardy. Jaqynda ǵana birlesken zertteý tobynyń jedel jáne úılesimdi jumysynyń arqasynda Qazaqstan aýmaǵynda tirkelgen brıtandyq jáne ońtústik afrıkalyq shtamdarǵa tán SARS-CoV-2 vırýsynyń mýtasııalary salystyrmaly túrde qysqa merzimde rastaldy. Qazirgi ýaqytta atalǵan vırýstardy bólý boıynsha jumystar júrgizilýde. Bul vırýstardyń bolýy bizdiń ǵalymdarymyzǵa COVID-19-ǵa qarsy otandyq, sondaı-aq sheteldik vaksınalyq jáne dárilik preparattardyń tıimdiligin baǵalaýǵa múmkindik beredi», jazylǵan áleýmettik jelide jarııalanǵan málimette.
Ortalyq mamandary atalǵan shtamdardyń bar ekenin der kezinde anyqtaý mýtasııalardyń kóptep taralýyna jol bermeý úshin óte mańyzdy ekenin aıtady.
«Búgingi tańda eki vaksına alyndy.Olar – nanoemýlsııalyq maı adıývantyna negizdelgen sýbýnıttik vaksına jáne nanobólshekterge negizdelgen vaksına. Dúnıejúzilik densaýlyq saqtaý uıymy olardy Naruvax-C19 jáne NARUVAX-C19/Nano degen ataýmen «kandıdat vaksınalardyń» tizilimine engizdi. Qazirgi tańda bul ekpeler bizdiń ǵylymı ortalyqta janýarlarǵa synalyp jatyr. Iаǵnı, klınıkaǵa deıingi SPF-zertteýleriniń sońǵy kezeńinen ótýde», delingen ortalyqtyń resmı aqparatynda.