Qaznette osy jyldyń 30 naýryzynan bastap búkil el boıynsha Ulttyq biryńǵaı testileýdi tapsyrý prosesi eki aptaǵa toqtatylatyny týraly habarlama tarady. Bul – jalǵan aqparat, dep habarlady stopfake.kz.
QR BǴM Ulttyq testileý ortalyǵynyń dırektory Dıdar Smaǵulov 30 naýryzdan bastap UBT-ny keıinge qaldyrý týraly qaýesetti joqqa shyǵardy.
– Iá, bul feık. Túlekter KVI juǵýy múmkin dep qaýiptense, UBT-dan bas tartý týraly ótinish jaza alady, biz olarǵa aqshany qaıtaryp beremiz. Jalpy, test tapsyrǵysy keletinder ony qazir nemese shilde-tamyz aılarynda tapsyrady, ne bolmasa odan bas tartyp, aqshasyn tolyq qaıtaryp alady. Biraq UBT ótkizilmeı qalmaıdy, – dedi ol.
Bıyl UBT-nyń naýryz aıyndaǵy kezeńi alǵash ret «bir testilenýshi – bir kompıýter – bir kamera» qaǵıdaty boıynsha elektrondyq formatta ótkiziledi. Testileý 10 naýryz ben 10 sáýir aralyǵynda uıymdastyrylady. Oǵan bıylǵy jáne ótken jyldardaǵy orta bilim berý mekemeleriniń túlekteri, sheteldik orta bilim berý mekemeleriniń túlekteri, sondaı-aq aldyńǵy testileý kezinde JOO-ǵa tegin negizde qabyldaý úshin shekti ball jınamaǵan nemese nátıjeleri joıylǵan adamdar qatysa alady.